Sim Maqıblonutho camu mşawrono rişoyo du Tukoso du Sutoro dcala Mşihoye Richard Ghazal

U mşawrono rişoyo du Tukoso du Sutoro dcala Mşihoye Richard Ghazal dkıtyo man abne du camaydan, mıştawtafle l’tahrazto du frosqolo b’Amerika.

 Bu mamlo dsımle Ghazal bi tahraztathe, mahkele cali aykanoyutho da Mşihoye u dilonoyith du camaydan bu Madınho Mescoyo u grışle u zuhoro calu qtolğenso hatho dıkmaşyo Turkiya calu camaydan, calan Armınoye u cala qalilotho hrene du qlimo.

İ mqadmonitho di tahrazto du frosqolo the Son Rise Morning Show, maczamla u mşawrono du tukoso İn Defence of Christians-İDC, Richard Ghazal leşan dorşo acme i aykanoyutho da Mşihoye bu Madınho Mescoyo. Bu şuroyo di tahraztathe mşayıl, bu zabno di mdabronutho hathto d’rakiwo ucdo b’Amerika, hınne xıd tukoso mın kınutri mena bu haqlo da fulhone di hirutho Emwothoyto da tawdiyotho bu şuroyo dkulle kıle cal Lebnon.

Ghazal dkıtyo man abne du camaydan mhanele u rişono hatho wi mdabronuthayde bu nuholayde u mırle; Ahna msimonena di şultonutho hathto gıdmdawmo u gıdmaqwiyo a fulhone dsımla i mdabronutho d’Trump leşan a Mşihoye du Madınho Mescoyo. Lebnon kiban dımmina, matyo l’maşıqlo ğalabe casqo u hani 6 yarhe, heş dlo şultonuthoyo u camo kıcoyış baykanoyutho lo tawto u hol falge da bnaymothoye du athro dkıtle mınyono celoyo d’Mşihoye, faqirene. Hıdo ma celotho rişoye di aykanoyuthatheste, u tathir dkıtle u İran aclaya bu darbo d’Hizballah’yo. Calathe kıtulbina mi şultonutho d’Biden dımdawım u snodayde l’Lebnon lo bu darbo di şultonuthayde elo ba şutose mdinoye, hol dmitarkıw şultonutho qwitho. Ksundinaste a hayle folhoye d’Lebnon u dlıklozım dhowe ğer hayle lo qonunye bu athro. Hizballah qento raboyo li ithutho da Mşihoye b’Lebnon.

Cali sbutho d’Turkiya Ghazal mawdacle, bgawe dıhdo şato u britho shıdla cala zawce u cala camle dsımla Turkiya dkımdawmo u qtolğenso dsımwola meqım 100 eşne calan Armınoye u cala Suryoye-Othuroye bıgawe du athro u ban athrawotho şbobe. Mathlo du medano, mbahasle Ghazal cali cito d’Ayasofia dsimo masığdo. Camatheste idicoyo d’Turkiya ksundo i marhıbonutho u kımahrıwi i mşaynutho du qlimo. Ghazal mırle; U mede dkıtyo msimono, dhem u rişono hatho Biden wu waziro di baroyutho saqıbloye d’Turkiya’ne u mqabıl du qedomo dkıtwole Trump l’Ankara.

Ghazal mırle; İ ntırtaydan mi mdabronutho hathto, dmahto klayto csitho mqabıl d’Turkiya’yo wu hboso dıksaymo cala Mşihoye wu camathe’ste, d’Biden dımşarır u şudoyayde bi mawdyonutho du qtolğenso dan 1915 u dlo miqadım snodo l’Turkiya hol dıkmdawmo ba zawcani. Camathe’ste kubcina di şultonutho hathto, dmawdıyo bi Mdabronutho yothoyto du garbyo udu madınho d’Suriya. A Suryoye- Othuroye du qlimano kmimodi nişo baroyo bu cnufyano d’Turkiya u Amerika klozım dmaklıyo a hçomani. Ksundina a tedbire dmahıtwole Trump cal Turkiya-elo hani klozım dmidawmi u hatta dmitaqşın.

Bu huthomo di tahraztatheste, mşayıl şwole cala Mşihoye d’Nigeria u Ghazal m’akadle, da Mşihoye du athrano kmitafiti hınne’ste b’qtolğenso ma ğrobe Maşılmone qaşye u calathe kito sniqutho di mdabronutho hathto dmaydo u şwolano’ste li ido dsaymo u sutorathe.