Sim qrayto laşan mcadronutho lu cameydan b’Lebnon

U metrofolito di marcitho d’Belçika, Fransa u Luksemburg Gewargis Gawriye camu mawtbo celoyo, frıslın egartho dıktulbi mcadronutho la sniqoye du athro d’Lebnon.

 Me gabo hreno gıdmitayıb yawme d’Cruto 14 bu yarhano, bi şoctho da 8 u falge d’casriye, tahrazto hayo bu froshezwo d’Suroyotv leşan i mcadronutho du cameydan d’Lebnon, dıhzele husrono rabo ba furqoce.

 Bi egartho dıfrisole u efetrufo fatıryarxoyo dıktocın i kirath ido du efetrufo u rişono du mawtbo celoyo di marcitho Sabri Hircan, tlıblın mu cameydan dımqadım mcadronutho lu cameydan d’Lebnon, bu darbo da mawtbo da citotho yaste bu konto di banka di marcitho.

Bi egarthathe kmitahke cala 2 furqoce dhawın yawme dı tlotho wa husrone momunoye u nafşonoye dhulın lu cameydan dıkhoye b’Lebnon, d’ğalabe menaye fayişi dılo bote u dılo dukotho du fyoşo. I egartho kımmo; mawxa ulsoyoyo dı qudrina dımcawnina u cameydan d’Lebnon.

Me gabo hreno yawme d’Cruto 14 bu yarhano, bi şoctho ba 8 u falge d’casriye gıdmisım tahrazto hayo di mcadronutho b’Suroyo tv, bnişo dmitaltım mcadronutho lu cameydan d’Lebnon calu darbo du gabo du Huyodo Suryoyo Tibeloyo-USUP leşan dmalhıq a mcadronwotho lan abne du cameydan dkıtne sniqoye.

Xıd kıtyo idico bıthır ma furqoce dhawınwo, ğalabe mu camo hzele husrono rabo u calathe klozamle mcadronutho momunoyto, leşan dıqodır dfoyış bu athro da abohothayde.