Sim saxtakariye rabtho bhaq da grube mzayne d’Alhaşd Alşacbi

Nafıq liholo saxtakariye rabtho bhaq da grube mzayne d’Alhaşd Alşacbi du Iraq dıkmısnodi mu athro du İran.

 Qoyumo Iraqoyo bi maqırhonutho dhule, mawdacle da rişone d’Alhaşd Alşacbi kmaydi mi şultonutho d’Boğdod ağre awkith mcaşe d’mharbone dkıtyo u menyonaththe zıd b’tloth nqalat mu menyonaththe u şariro.

 Bu zabno dıkcoyış u Iraq baykanoyutho haruto du momuno mi celtho du tathir du qrobo udu virus d’Corona, u qoyumo bu parlamento d’Boğdod Fayeq Alşex Cali bi maqırhonutho dıfrısle bi dafayde du Twiter mırle “u menyono şariro da haylawotho d’Alhaşd Alşacbi bu Iraq kmote l’48 alfo mharbone, elo arişone da grube d’Alhaşd kmaydi ağre mcaşe d’130 alfo mharbone”.

 Qoyumo Alşex Cali mawdacle dkito furşono rabo dıkmote l’82 alfo mharbone bayn du menyono şariro da mharbone d’Alhaşd Alşacbi wu menyono danağre dıkmitahwın l’mharbone dlatlın ışmo aw ithutho.

 Callathe, qoyumo Alşex Cali tlıble ma Iraqoye kulle dmabdın kampanya d’buqore cala mcaşe dıkmitahwın l’82 alfo mharbone d’Alhaşd Alşacbi dlatlın bu asas lo ışmo ulo ithutho.

Camgabıd da hjome dıksaymolın İsroyel cala grube mzayne d’Hizballa du Iraq awkith d’Alhaşd Alşacbi, u rişwazireste du Iraq Mustafa Alkazimi hule amro li wazirutho di gawoyutho dmahto ido calu zayno dlatyo ruşmoyo bu Iraq. Wucdo cami saxtakariye dnafiqo bhaq da rişone d’Alhaş Alşacbi kmahwe athi u zabno du tetimo da grubani bu Iraq.