Sim socurutho li qoyumtho da sohde Suryoye du Sayfo b’Lubnon

U rişono du gabo du Huyodo Suryoyo Tibeloyo d’USUP İbrahim Murad, tlıble şubqono ma sohde du camaydan du qtolğenso du Sayfo, cal dlıqadır u gabo adşato dımtayıb htifutho xıd kul şato bi cıhnutho du qtolğenso da na’1915, mi celtho da tedbire dmidi mqabıl du kewo d’Corona.

U mamlano sımle Murad, bu zabno di socurutho dsımle li qoyumtho da sohde du Sayfo dkıtyo bi mditho d’Bayrut.

Bi cohnutho da 105 ışne du qtolğenso du Sayfo dsımla i mamlaxtho da Cothmanoye calu camaydan u Suryoyo, u camo Armınoye, a’Yawnoye Pontusoye wa Suryoye Marunoye bu Turo d’Lebnon, u rişono du gabo du Huyodo Suryoyo Tibeloyo d’USUP İbrahim Murad cam taşdarto dıkmişaklo ma hadome di mdabronutho d’USUP u acmaye qaşişo Şarbıl Bahhe u mathlono du rişono di marcitho Suryoyto d’Bayrut hasyo Danyel Gawriye, sımlın socurutho li qoyumtho da sohde Suryoye du Sayfo dkıtyo bu wahdo di cito d’Mor Afrem da Suryoye Ortodoksoye bi mditho d’Bayrut. Ubi socuruthathe, Murad u qaşişo Şarbıl mahıtlın klilo d’warde cali qoyumtho du Sayfo, u mathkarlın u yawmo şatonoyo da sohde du Sayfo.

Bıthır mıdmahıt u klilo da warde, qaşişo Şarbıl maqımle slutho cali ruho da sohde du Sayfo da na’1915 u mırle “bu yawmo mbarxano methkanaşlan camu gabo du Huyodo Suryoyo Tibeloyo laşan dımsalena udmathkırina u qtolğenso mariro dhawiwo calu camaydan u Suryoyo wa came Mşihoye gawonoyith ba n’arcotho di mamlaxtho Cothmanoyto. U athina larke laşan dımakdina la sohde du camaydan u Suryoyo d’ahna ksaymina ukfılhina lfuth i wasiye d’Moran Yeşuc Mşihoye uda şlihe uda qadişe kulle. Uktılbina dmıfroso i hubo wu şlomo bayn di noşutho dilonoyith ba şartat casqe du hulmono dkito bu maşıqlano ducdo.

Megabo hreno, u rişono d’USUP İbrahim Murad bu mamlo dsımle tlıble şubqono ma sohde du Sayfo Suryoyo cal du gabo lıqadır adşato dımtayıb hfitutho kul şato bu siqumo d’24 Nison, bnişo dmitathkıri a’sohde du camaydan, da n’Armınoye uda Suryoye Marunoye, uba melani mdawamle “ahna xıd gabe u şutose du Mawtbo Umthoyo d’Bethnahrin d’MUB, qadrina dmawdıcina a’came dıbritho i barbroyutho du qtolğenso dsim aclayna ma Cuthmanoye Turkoye dkımdawmi dmankıri i şroruthathe. Ahna aminoyith kımakdina dgıdfayşina şarire la sohdaydan uli sbutho du camaydan, ukobina ste şudoyo dgımdawmina u ağunaydan hul dmitadcıri a’zedqe kbişe du camaydan u Suryoyo. U ahna lıgıdşıbqina Turkiya meqım mıdmıctarfo bu qtolğenso du Sayfo ud’obo tezminat kamile lu camaydan”.