Sim tagliyotho mqabıl du qonuno hatho di şultonutho d’Fransa

Ba tagliyotho rabe dsimi bı mdinotho frişe d’Fransa, mahwele u camo hfuxyo mqabıl du cnufyo du polis u mqabıl du qonuno hatho dımbayanla i şultonutho leşan i mşaynutho.

 Bu zabno da tagliyothaniste, qayithi a mtagliyone u polis bıhdode u msik ba asrowat dıbnaynoşo.İ wazirutho di gawoyutho mawdacla, la tagliyothani mıştawtafle hol 50 alfo bnaynoşo bı mdinotho frişe du athro; beynothaye 5 alfo bi arişkoyto Paris.

Athmıl naqla hreto kfix u camo Franşoyo la zabuqone dı mdinotho frişe, u sımle protesto u cnufyo qaşyo dıkmaşe u polis mqabıl da mtagliyone u bebzabno, u camo tlıble dhowe şuşoto di mşaynutho du momuno. Camatheste a mtagliyone sımlın protesto u qonuno hatho dkubco i şultonutho dmarkıwo bu athro.

Lfuth u qonunano, lıkowe dmıgrış surotho, vidyowiye bu polis bu zabno dkıtyo bi wolitho. Ba tagliyothani dathmıl dsimi b’90 dukotho u mdinotho frişe du athro, krih u qonunano u mawdıc, bu şıkılano kibe u polis dsoyım u mede dkobıc u noşo laybe dtolıb hşowo mene u dımjazele u qonunanoste dyoşo du renyo hiro,du tboco froso u dyoşo di hirutho du tuyobo da tagliyothoyo.

Bu mamlo dsımle u rişqutno Franşoyo Emmanuel Macron mırle; Ono lıkmaqbalno dmitamır, dıkdayşina i hirutho b’Fransa hathe duglo rabthoyo, ahna latna lo Hungaria u loste Turkiya. Macron krıhleste u cnufyo dsımle u polis mqabıl da mtagliyone u mawdacle, di şultonutho gıdmaydo i sbuthathe li ido.

İ wazirutho di gawoyutho mawdaclaste, bu zabno da taxtuşe qaşye dhawın beyn da mtagliyone u du polis b’Paris, msik 22 farsufe. Meqım şabthoste mıştawtafwole hol 500 alfo la tagliyotho dsimiwo b’Fransa bi mıştawtıfonutho da tahbaryotho, şutose frişe du kenşo mdinoyo.