Sim tahdid hreno lu waqıf d’Hrant Dink
İ sniğarto du waqıf d’Hrant Dink, bi maqırhonuth dhuwla lu tbocofroso mawdacla u tahdid dhawi calu waqıf, latyo u haroyo elo athmıl naqla hreto matilın tahdide.
İ sniğarto Fethiye Çetin mırla; A tahdide dkothın lu waqıf l’Rakel Dink, kdomın lu zabno du qatlo d’Hrant Dink.
Bıthır ma mamle u tnoye da mşale di şultonutho d’Turkiya mqabıl da came, wa mamle di frişutho kowın, kzaydiste a hjome cala Armınoye bşıkılat mşahılfe.
Bıthır mu tewqido di cito şlıhwo u Slibo dıhdo cito, u bıthır mqadım tahdide lu waqıf d’Hrant Dink.
Bıthır mu tahdidano d’ğalabe farsufe mahwelın hfuxyo mqabıl dide, mu gabo di şıltonutho layto qolo bhaq di sbuthathe. Elo lfuth i mawdconutho dhiwo, naqla hreto sim u waqıf u l’Rakel Dink tahdid bu darbo du mail.
Lfuth i sniğarto du waqıf, u tahdid dathi athmıl cayni mele dkıtwın du tahdid qamoyo. Harke kımahwe dlatyo ha farsufo lruhe dıksoyım a tahdidani elo kito grub bıthre dıksaymi a tahdidani.
I sniğarto kımmo; camıhbol a mamle u maqırhonwotho da rişone dkıtne malye bcelıdboboyutho u frişutho, kobın jasara lhowxa grube dsaymi a tahdidani, u hathe bıthır manıhtıne la haye. Bebzabno a farsufani hawi hzayto acmaye di şultonutho kımhafdo aclaye ulı kobolın msombrişo awkith çeza.