Sim taklitho mqabıl du fusqono du bethdino d’Turkiya dıkhokım Dayroyo Aho

U şutoso d’Clayme Suryoye adyawma naqla hreto sımle taklitho, leşan dmaşmıc u qolo du dayroyo Aho belicen du bethdino d’Turkiya ktohamle bi marıhbonutho.

İ taklithathe dıfriso hayo b’Suroyo tv simowa mqabıl  rişizgado d’Turkiya dkityo b’Frankfurt d’Almanya.

 İ taklithathe dımşarewola ba slogane mqabıl d’Turkiya-dımhawriwo a mıştawtfone u tulbiwo hirutho lu dayroyo Aho, claymutho mtakasto athro hiro, awyutho camu camo d’Turabdin, u krıhlın i klayto d’Turkiya mqabıl du camo Suryoyo mu zabno du Sayfo hol adyawma.

Bi taklithathe dsimo qum du bınyono du rişizgado d’Turkiya dkıtyo b’Almanya a mşale d’gabe u şutose du cameydan ba mamle dsımlın, mahkelın dkıtne mqabıl du thomo du dayroyo Aho Bilecen u be bzabno mathkarlın u duxrono da 2 hsayo htife du cameydan wu qentruno Said Malke dkıtyo msiko b’idothe di şultonutho d’Suriya, u griş u zuhoro calu bethdino du mgabyo di qritho d’Arkah Jusef Yar.

Bi qamayto i rişonitho du şutoso da Clayme Suryoye-Manuela Demir mqadamla u mamlo u mathkarla a dyoşe dkowın calu cameydan mu zabno du Sayfo hulucdo. Bu mamleyda krıhla u qedomo di şultonutho Turkoyto li sbutho du dayroyo, du qoyumo du cameydan-Tuma Celik, li sbutho di iqartho be Diril wa hçome hrene dsimi calu cameydan.

Cal ışme du Huyodo Suroyo d’Urifi-ESU Abgar Ay mqadamle mamlo bu leşono Almanoyo u tlıble d’Turkiya dgurşo u dmaqimo u thomo dcalu dayroyo Aho Bilecen. Cal ışme d’DETA Robil Gergin mqadamle mamlo dmırle; Ahna xıd camo gıdnufqina moro lu cameydan, la dayreydan xıdi dayro d’Mor Gabriel wi dayro du Zacfaran u ğer.

Cal ışme du Huyodo da Neşe d’Bethnahrin-HNB Turkan Mbaydono mqadamla mamlo u krıhla a hçome dkowın calu cameydan u dilonoyith cali tawditheydan b’ışme du dayro Aho Bilecen. Sarkis Bar Tewodoros’ste mqadamle grışle u zuhoro calu cameydan ucala hcome dkowın acle u dlo kobe darbo dmitahwe husrono lu cameydan. A hadire dmotewo u mınyonathe l’100 farsufe lfuth a tadbire di corona mhalahliwo u mhalqiwo slogane u mahwelın u morlathe u celoyo u gıdnufqi kull naqla moro lu camathe.