Sim u cufoyo d’Hasyo Mor Yacqub Bahnan Hındo bu athro d’Lebnon

U fağro du mnohnafşoTlithoyo tube hasyo Mor Yacqub Bahnan Hındo d’nqılwo ma hayani bi mdito d’Paris, mcafe athmıl bu athro d’Lebnon.

Lu cufoyo du rişhasyo catiqo di marcitho di Hasake u d’Nsiwın di cito Suryoyto Qatholiqoyto, mıştawtafle menyono d’fatıryarxe u hsayo, rişone da citotho mşahılfotho du camaydan b’Lebnon.

Athmıl casriye, i qadişutho du fatıryarxo di cito Suryoyto Qatholiqoyto Mor İğnatiyos Yusıf III Yunan mrayşanle u zawho du cufoyo du mnohanfşo Tlithoytube hasyo Mor Yacqub Bahnan Hındo dkıtwe u rişhasyo catiqo di marcitho di Hasake u d’Nsiwın. Lu zawhano dımtayıb bi dayro d’Sayıdıt Alnajat bu Turo d’Lebnon, mıştawtafle i qadişutho du fatıryarxo di cito Suryoyto Orthodoksoyto Mor İğnatiyos Afrem II, u menyono celoyo ma hsayo da marciyotho di cito Suryoyto, di cito Suryoyto Marunoyto, di cito Suryoyto Malkoyto udi cito Armınoyto dkıtne b’Lebnon, b’Suriya ubu Ciraq, cam menyono hreno d’xuroye, kohne, şamoşe, dayroye u dayroyotho da marciyotho d’Beyrut.

Camgabıdathe, mıştawtafle’ste lu zawho du cufoyo mhaymne; beynothaye an ahunone u ahwotho wu ahıl wa qaribe du tlithoytube. Fatıryarxo Yunan bu mamlo dsımle, mahkele cala haye du tlithoytube dınqil ma hayani bıthır mıdhuwole ağuno mqabıl du kewo l’zabno d’zıd m’tarte ışne, ubıthır m’şablonutho dımdawamwola l’22 ışne li marcithayde di Hasake udı Nsiwın.

Bebzabno, fatıryarxo Yunan mqadamle a’buyoyayde la hadome di Sunados mqadaşto, li marcitho du tlithoytube uli iqarthayde. Bıthır a kohne u şamoşe tcınlın u fağro du tlithoytube, u makraxlın b’zuyoho ruhonoyo hedor du madhıbho dı qdoş qudşin. Camgabıdathe, u rişizgado du Vatikan b’Lebnon qrele an’egrotho dımşadri mi qadişutho du papa Mor Fransis Qadmoyo umu rişono di Sunados da citotho madınhoye kardinal Leonardo Sandri.

Bu huthomo du zawho du cufoyo, u fağro du tlithoytube hasyo Mor Yacqub Bahnan Hındo mahıt ba bethıqbure da hsayo u kohne laltah di cito di dayro d’Sayıdıt Alnajat.