Sim u duxrono du qtolğenso da Armınoye bı dukotho frişe

YEREVAN – U rişqutno d’Armenia Vahagn Xaşaturyan wu rişwazire Nikol Paşinyan, u rişono du parlamento Alen Simonyan cam ğer mşale frişe du athro, sımlın socurutho li qoyumtho du qtolğenso u mahıtte klile d’warde u mathkarlın a Sohde Armınoye u bıthır mdawamlın li bethcatiqotho du qtolğenso. U fatıryarxo Karakin II’ste sımle socurutho li qoyumtho u maqımle teşmışto cali ruho da Sohde. Ba citotho du athro kulle’ste, mathkır u qtolğenso dan 1915. U camaydan wu camo Kurdoyo dıkhoye b’Armenia, mathkarlın u qtolğenso dsımwo calan Armınoye.

Nelly Harutyunan dkıtyo mu camaydan d’Arzni mırla bu duxrono şatonoyo dsim; U qtolğensano, didan kulayna’yo. Fayıt 110 eşne acle elo a çurhe dtrele guşmonoyo u nafşonoyo kıçubrilan dobina mrodo leşan i kinutho. Bu qtolğensano, lo belhude an Armınoye qtili elo u camaydan’ste axile dharbo qşitho u calathe i wolithaydan’yo dhudrina ba duxronani kull şato. U rişwazire d’Kanada Mark Carney frısle athmıl egartho lan Armınoye dkıtne b’Kanada u mathkarle u qtolğenso dsımwo calu camo bu zabno du qrobo qamoyo dbritho.

U rişwazire grışle’ste bi egarthayde u zuhoro cali golutho dan Armınoye me Qarabax bu zabno du qrobo dhawiwo cam Azerbaijan. U komisyon du Huyodo d’Urifi dıkmtahqıb i mşaynutho d’Armenia frısle egartho bi dafayde u mathkarle u qtolğenso dan Armınoye. U qoyumo Hollandoyo Don Ceder dkıtwo acle lbuşto d’remzo dlo mıtce u qtolğenso sımle athmıl mamlo bu parlamento u mırle; Adyawma u duxrono da 110 eşne du qtolğenso dan Armınoye’yo dqtılwo ebe hol milyon u falge d’gabre, neşe u nacime dlo htitho.

Athmıl’ste u bınyono di karxutho d’Paris d’Fransa, sımla baytoyutho lu duxrono dsımwo leşan u qtolğenso dan Armınoye. Lu duxronano dhadırle qoyume, wazire u mşale frişe du athro u acmaye u rişizgado d’Armenia b’Fransa, tukose frişe dan Armınoye u camo Armınoyo. Bu mamlayda, i rişonitho di karxutho Anne Hidalgo m’akadla cali ulsoyutho da duxronani leşan dlo mitahwe mkono naqla hreto dmisomi cali noşutho.