Sim u duxrono du Sayfo ba citotho Suryoyotho Orthodoksoyotho b’Urifi

SWED – U efetrufo fatıryarxoyo di marcitho du Swed hasyo Mor Diyosqoros Benyamen Ataş, mrayşanle athmıl u Qurobo Alohoyo dsim bi cito d’Mor Afrem b’Södertelje du Swed u bıthır u hasyo, a kohne wa şamoşe nafiqi li dırto qum di qoyumtho du Sayfo u maqımlın teşmışto cali ruho da Sohde du qtolğenso. U rişono di marcitho du Swed u d’Skandinavia hasyo Mor Yuhanon Lahdo, mrayşanle u Qurobo Alohoyo dsim bi cito d’Mor Yahkub da Sruğ u maqım teşmışto cali ruho da Sohde.

Bıthır mi slutho, myaqro Emanuel Poli, huwle turgomo la hadire dkıtwın bi cito cali siyase, cala plane ucala qatle sistematik dsımwo calu camaydan mi mamlaxtho Cuthmanoyto. Bi cito d’Mor Fetrus d’Hallonberg du Swed, mahkele abuna Jimmy Danho cali celtho dımbayın u siqumo du Sayfo du camaydan l’15 Hziron.

Bi cito d’Mor Aho b’Örebro du Swed camgabe di slutho dsimo bi cito, qum di qoyumtho du Sayfo’ste layimi bıthır a kohne abuna qaşişo Melek Ulger, abuna qaşişo Yahkub Qaselia wu abuna Ablahad maqımlın teşmışto cali ruho da Sohde u sim mamlo me Sacid Baran uğer u mahke cali mıcne du duxronano.

U Komisyon 1915 b’Enschede sımle duxrone du Sayfo. Me gabo hreno b’Beljika’ste hadiri a kohne da citotho camu camaydan d’dukotho frişe qum di qoyumtho du Sayfo. Bi hfituthathe camgabe dımqadım teşmışyotho cali ruho da Sohde, sim’ste mamle cali mıcne du yawmano ukle cali ulsoyutho di mawdyonutho bu Sayfo du camaydan.

Qum di cito d’Yuldath Aloho b’Ektorp du Swed’ste mathkıro i ruho da Sohde du camaydan. Bi cito d’Yuldath Aloho ubi cito d’Mor Augin b’Hollanda sim u duxrono du Sayfo ubi dayro d’Mor Afrem’ste, mrayşanle i mcalyutho du hasyo Mor Polikarpus Augin Aydin i slutho dsimo u mathkıri a Sohde qum du tamal di qoyumtho dgımitahto bıthır bi dayro.