Sim u futoho di bethcatiqutho da sohde du camaydan di mditho d’Bağdede

Sim u futoho di bethcatiqutho da sohde du camaydan di mditho Suryoyto d’Bağdede di daşto d’Ninwe.

Lu futoho di bethcatiqutho da sohdani dnafliwo bu qrobo bayn du Iraq udu İran uba qrobe hrene du Iraq, mıştawtafle menyono d’rişone citonoye u mathlone d’şutose folhoye uba mowat du camaydan d’Bağdede.

U rişono di marcitho d’Mawsal ud’hedora di cito Suryoyto Qatholiqoyto hasyo Mor Yuhanna Bıtrıs Muşe, ba yawme dşaficina mrayşanle u zawho du futoho di bethcatiqutho da sohde du camaydan di mditho Suryoyto d’Bağdede, dnafliwo bu zabno du qrobo dhawiwo bayn du Iraq udu İran ba tmoniyat du doro dşaficina, ubu zabno du qrobo du Xaliç ubıthır mu tedriyo du rejim catiqo du Iraq i şato da 2003.

U zawhano dsim bi cito d’Mor Yuhanna bı Bağdede, mıştawtaflele menyono d’kohne u mathlone d’şutose di mşaynutho uba mowat d’comure mu camaydan.

I hfituthathe dımşarela b’qatinto d’şetqo cali ruho da sohde du camaydan udu Iraq, mdawamla camu mamlo du futoho dsımle u kohno di marcitho d’Mor Yuhanna qaşişo Roni Momika, dımqadamle ebe a tawdiyothayde la şutose ula n’abne du camaydan kulle dımcadarlın momunoyith bu hethotho di bethcatiqutho da sohde d’Bağdede.

Camgabıdathe, hasyo Mor Yuhanna Bıtrıs Muşe bu mamlo dsımle mawdacle dlayto mede rabtır mi sohdutho, u mırle ”a’nacimaydan dhawın sohde laşan du athro, kmahtina a’surothaththe b’gawıd di bethcatiqutho, laşan kul yawmo dmamtın l’bolayna dkıtne acmayna ba haye, udmathkırina u admo dbızlın bnişo dmınfıq moro lu athro uli mdithaththe uli haymonuthaththe”.

I bethcatiqutho da sohde du camaydan d’Bağdede, khıbşo b’gawa hedor d’400 surotho d’sohde, u medone hrene dıkmadili cali barbroyutho dı Dacış wu tehriwo dıtrewole bi cito d’Mor Yuhanna dıksaymo baytoyutho li bethcatiquthathe.

I bethcatiqutho da sohde du camaydan d’Bağdede, sımwo u futohayda i şato da na’1991, elo mahırwoa b’şıkıl rabo bu zabno dıkbışwole u tukoso marıhbono dı Dacış i daşto d’Ninwe bi şato da 2014.