04/03/2021

Sim u futoho di bethsawbo Othuroyto d’Nsiwın di theoloğiya b’Sidney

Bi mdito d’Sidney d’Australia, sim u futoho di bethsawbo Othuroyto d’Nsiwın di theoloğiya.

 Lu zawho du futoho di bethsawbo, mıştawtafle menyono celoyo d’hsayo, kohne, akademikoye u mathlone d’şutose marduthoye u kenşoye.

I cito d’Madınho d’Othuroye b’Australia kımdawmo dsaymo tarmiyotho bu haqlo du yulfono şaryo, u mşatasla ucdo i bethsawbo ruşmoyto qamayto d’ruha bu haqlo di theoloğiya, bıthır mıd mşataswola madraşyotho dilonoye dıkmaqrın fırce mşahılfe, u acmaye’ste bethsawbo du leşono Suryoyo.

Bi rişonutho du wakilo fatıryarxoyo da marciyotho d’Australia, d’New Zeland ud’Lebnon di cito d’Madınho d’Othuroye-hasyo Mor Melis Zayya, sim meqım kmo yawme u futoho di bethsawbo d’Nsiwın di theoloğiya b’Sidney. Lu zawho du futoho mıştawtafle u efesqufo di marcitho du qlimo d’Viktoria udı New Zeland Mor Benyamen Eliyya, u rişono da marciyotho d’Australia udı New Zeland di cito Catıqto d’Madınho hasyo Mor Yahkub Danyel.

Hadırste kohne ma citotho mşahılfotho, malfone, akademikoye, hadome bi şultonutho federaloyto d’Australia ubi şultonutho gawoyto d’Sidney cam mathlone u mşale d’şutose kenşoye u marduthoye.

Bu zawhano du futoho di bethsawbo, sim mamle mu rişono di bethsawbo efesqufo Mor Benyamen, u hiğmuno di mdito d’Ferfield Frank Karboni, professor Mathew el Nivo, qoyumo Chris Bowen, i rişonitho di bethsawbo professora Diyan Speed, u rişono du mawtbo di mdabronutho di bethsawbo d’Nsiwın hasyo Mor Melis Zayya.

I bethsawbo Othuroyto mawdacla dıksaymo baytoyutho la yolufe dan athrawotho mşahılfe dbritho, umi celtho du virus d’Corona- a yolufe dkıtne larwal d’Australia gıdmitawlıfi bu darbo du nawlo.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…