Sim u futoho di cito d’Mort Şmuni b’Barıtle bi daşto d’Ninwe

Sim u futoho di cito d’Mort Şmuni da Suryoye Ortodoksoye bi mditho d’Barıtle bi daşto d’Ninwe.

 Bu zawhano du futoho di cito, mawdıcste dıdacır 180 yaqrotho galwoye mu camaydan la mdinotho u qıryawothathe di daşto d’Ninwe.

 İ daira da waqfat da Mşihoye du Iraq, sımla u futoho di cito d’Mort Şmuni da Suryoye Ortodoksoye bi mditho d’Barıtle bi daşto d’Ninwe, bıthır mıdşafıc arbac ışne dmaklewola i mşablonuthayda la mhaymıne, mi celtho du shofayda ma grube marıhbone dı Dacış.

Lu zawho du futoho di cito, mıştawtafle rişone tawdithoye citonoye u maşılmone, u hiğmuno d’Ninwe Najım Aljabburi, mşale u mathlone d’şutose kenşoye u mdinoye u ruşmoye cam menyono mu camaydan dı Barıtle.

U hiğmuno d’Ninwe Aljabburi bi maqırhonutho dhule li sfaryawmo d’Alsabah, mawdacle da şutose di ardixlutho da karxıwotho d’Ninwe u bi methcadronutho da şırkat di wazirutho du bnoyo, mkamelın a fulhone du bnoyo di cito d’Mort Şmuni bı Barıtle, bıthır mdıshifowa ma grube marıhbone dı Dacış. Aljabburi mırleste “i cito d’Mort Şmuni sim u futohayda bıthır mıdkamıl u bnoyo da ferce u qeloyotho wa salone u şurone dlarwal u dlawğıl di cito”.

Camgabıdathe, Aljabburi bi maqırhonutho dhule mawdacle d’180 yaqrotho mu camaydan dımgalwewolın lu qlimo d’Kurdistan du Iraq, daciri ba yawme haroyani la mdinotho u qıryawothathe bi daşto d’Ninwe. Aljabburi mawdacleste da yaqrothani daciri la botathe bıthır mıdmarkıwo i mşaynutho b’gawıd di daşto u bıthır mıdsim u bnoyo u hethothayda bu haqlo di mşablonutho kenşoyto.