Sim u futoho di gantho bi qastra d’Telkepe bi daşto d’Ninwe

Sim u futoho di gantho bi şawtho d’Bobel bi qastra d’Telkepe du camaydan bi daşto d’Ninwe.

 Camgabe di ganthathe, mtayıb’ste bazar da syome di ido bnişo dmitaqwe u momuno yothoyo da neşe di daşto.

 İ Mtakasto İtaloyto d’UPP bu taro di tarmitho d’camıhdode lu şlomo”, sımla u futoho di gantho bi şawtho d’Bobel bi qastra d’Telkepe bi daşto d’Ninwe. İ ganthathe sim u futohayda bıthır mıd kamili a fulhone du hethothayda. Ulu zawho du futoho mıştawtafle mşale folhoye, mathlone di mtakasto d’UPP ud’şutose hrene cam grub mi claymutho d’Telkepe.

İ rişonitho du grub di tarmitho Valantina Cali, bu mamlo dsımla mahkela cali tarmithathe dıkmisomo b’4 dukotho bi daşto d’Ninwe, u mırla; İ tarmitho d’camıhdode lu şlomo kmisomi mi Mtakasto d’UPP bi mıştawtfonutho di Mtakasto Emwothoyto d’Maltizer ubu snodo di wazirutho di methcadronutho momunoyto udu quyomo d’Almanya BMZ. U nişo di tarmithathe dmitaqwe u dawro di claymutho, di mardutho udi mlahmonutho kenşoyto bi daşto d’Ninwe’yo. İ gantho d’Bobel gıdhuwyo qentrun kenşoyo la comure d’Telkepe leşan dmafiti u zabnaththe eba. Meqım mathe’ste sımwo u futoho di betharke gawonoyto d’Telkepe, u wahdo d’Bağdede du sport, u ganotho da nacime bı Barıtle, bi qastra d’Nemrud u b’Bahşiqa.

Lara Jıbrael Tuma dkıtyo malfonitho bu qentrun di claymutho d’Telkepe, bu mamlo dsımla bi hfituthathe mırla; Adyawma twırlan a thume du cnufyo kulle, leşan dşufcina lu maşıqlo di ciyeşe beyn da came mşahılfe d’Telekpe. Adyawma sımlan u futoho di ganthathe leşan dımmina du şlomo kibe dhowe bi mıştawtfonutho d’kulayna ba haye gawonoye d’Telkepe.

Bıthır mathe, claymo qrele mimro bu ışmo “i hubo du athro”, u mtayıb hfitutho la nacime u masrahto dımqadmo mi claymutho d’Telkep dıkmgaşmo i hubo lu şlomo uli ciyeşe mşawtafto wu kroho du cnufyo udi tuhmonoyutho da mathhabe. Camgabe du futoho di gantho d’Bobel, i Mtakasto İtaloyto d’UPP mtayabla’ste bazar da syome di ido da neşe dkıtne ma qıryawotho d’Telkepe u d’Nemrud, bnişo dmitaqwe u momuno di athto wu dawro dkıtla bıgawe du kenşo.