Sim u futoho du qentrun hatho di marcitho d’Malankara di cito Suryoyto Ortodoksoyto du Hınd

Bi mditho d’Newjersy bu athro d’Amerika, sim u futoho du qentrun hatho di marcitho d’Malankara di cito Suryoyto Ortodoksoyto du Hınd.

 U zawho du futoho dımrayşanle i qadişutho du fatıryarxo Mor İğnatiyos Afrem Trayono, mıştawtaflele menyono celoyo d’hsayo uba mowat d’mhaymne.

 Yawme d’Şabtho dşaficina, i qadişutho du fatıryarxo di cito Suryoyto Ortodoksoyto Mor İğnatiyos Afrem Trayono, sımle u futoho du qentrun hatho di marcitho d’Malankara di cito Suryoyto du Hınd. I qadişuthayde mrayşanle u zawho du futoho bıthır mdımtayable teşmışto dımbaraxle eba i duktho.

Lu futoho mıştawtafle ste u hasyo di marcitho d’Malankara du garbiyo d’Amerika Mor Titos Taldo, u hasyo da Knacnoye d’Amerika ud’Urifi Mor Selwanos Ayyub, u efetrufo fatıryarxoyo di marcitho du madınho d’Amerika Mor Diyonisyos Jan Qawwaq, u hasyo di marcitho d’Hımıs ud’Hama udı Tartus d’Suriya Mor Timothawos Matta Alxuri, u ikliros di marcitho, a’rişone da karxıwotho d’Newjersy uba mowat dımhaymne mi marcitho d’Malankara.

U hasyo di marcitho Mor Titos Yaldo bu mamlo dsımle bi hfituthathe, mqadamle a’tawdiyothayde li qadişutho du fatıryarxo u mahkele cala maşıqle du hethotho du qentrun di marcitho, ubebzabno mqadamle ste tawdiyotho lkul man dhawi mcadrono ba hıdriyat du futoho du qentrun hatho.

M’gabo hreno, fatıryarxo Mor Afrem Trayono bu mamlo dsımle, mqadamle tahanyotho lu hasyo, la kohne ulu camo di marcitho, u grışle ste u zuhoro cala maşıqle mşahılfe dşafico ebaye i marcitho mu zabno di mşatsonuthayda uhul ucdo baynothaye a’qentrune mşahılfe di marcitho wa casqıwotho dkıtwo b’qamuthıd di tarmithathe i hathto.