Sim u yubolo da 25 eşne du Mawtbo Umthoyo d’Bethnahrin bi Paderborn, Almanya

PADERBORN, Almanya — I hfitutho du yubolo da 25 ışne du Mawtbo Umthoyo d’Bethnahrin d’MUB dımtaybo yawme d’Huşabo dşaficina bi mditho d’Paderborn bu athro d’Almanya, mşarela b’qatinto d’şetqo cali ruho da sohde du camaydan dıdbıhlın ruhaye udbızlın admaye calu madhıbho di hirutho du camaydan ba falqe mşahılfe du athraydan dı Bethnahrin.

Li hfituthathe mıştawtafle kunoşo rabo d’zmine u mothonoye tanone u sanode du ağuno dkobele u Mawtbo d’Bethnahrin Athroyo d’MUB, baynothaye mathlone ma gabe u şutose folitiqoye, tawdithoye u kenşoye du camaydan. 

Bi hfituthathe, sim mamle, qre mimre u mqadım zmirotho umthoye baynothaye u mamlo dsim bışmıd du rişono gawonoyo du Mawtbo Umthoyo d’Bethanhrin Mixael Nacim Hadodo dkali calu sebyono hiro du ağuno da Doronoye dmawlıd bi fnitho dı Turcabdin dkıtyo i dargışto da n’abohotho, udımbarbız bıthır bi qıtca d’Urifi uba n’athrawotho kulle d’Bethnahrin cıl ma casqıwotho rabe dıhzele. Bu mamlo dsim bışmıd du rişono gawonoyo du Mawtbo d’MUB, sim ste qroyto la gabe u şutose du camaydan dhowın mhayde camıhdode udmahti ido bido, bnişo dmıtlobi a’zedqe du camaydan b’ha qolo ub’sebyono hiro ba platforme emwothoye dıbritho.

Bebzabno, sim mamle mşahılfe ma mathlone da gabe u şutose du camaydan, baynothaye mamlo du hasyo Mor Yoliyos Hanna Aydin dkıtyo u mdabrono da n’esore tibeloye di marcitho d’Almanya, mamlo d’osyo musiqoro Abrohom Lahdo dımqalasle u ağuno folhoyo dkobın a’haylawotho du sutoro da neşe d’Bethnahrin u dmırle “u camo dkıtle neşe dkımdafci acle lıktoyım”, wu mamlo du rişono zawgoyo du Huyodo Suroyo d’Urifi d’ESU Fehmi Vergili. 

Bi hfituthathe ste qre mimre bu leşono Suryoyo ma tlotho omure du camaydan George Şamcun, Habsuno Bahho u Hanna Qaddoro. Wa zamore du lalyo haniwın: musiqoro Musa Alyas, zamoro Nucman Hanna u zamoro Awgin Tadaros dmaşmaclın zmirotho umthoye lu camaydan. 

Bıthır mathe, camu qolo da hulhole uba nquşkafe, a’zmine baynothaye a’mathlone da gabe u şutose du camaydan uda came hawrone mıştawtaflın camıhdode lu qtoco di kuktho du yubolo da 25 ışne d’MUB. I hfituthathe mdawamla camu zmoro u raqdo marduthoyo du camaydan huli şuctho da 12 du lalyo.