Sımme knuşyo bi mditho d’Camman amşale d’Yurdnon u d’Mısır

U malko d’Yurdnon, u rişqutno d’Mısır wu rişwazire du Iraq sımlın knuşyo bi mditho d’Camman.

Bayn da sebwotho dıdrişi bi ytawtathe, atlotho rişone bu zyudo dkulle kalın cali sbutho du şlomo cam İsroyel.

U malko d’Yurdnon Cabdalla Trayono, mıstaqbele athmıl bu qusrayde bi erişkoyto d’Camman, u rişqutno d’Mısır Cabdılfattah Alsisi wu rişwazire du Iraq Mustafa Alkazimi.

Bu buyono mşawtıfo dıfris lu tboco froso, atlotho rişone makadlın i ulsoyutho dmitaqwiyo i şawtofutho folitiqoyto, momunoyto u di mşaynutho bayn da tlotho athrawotho, u mahwelınste ithnihuthathe lu darğo di sdirutho udi methcadronutho folitiqoyto u stratijikoyto bayn d’Mısır, u Iraq u Yurdnon.

Bayn da sebwotho mşahılfe dıdrişi, atlotho rişone makadlın dıklozım dfayti la haye afulhone du şuroro du şlomo dıksoyım u garanti da zedqe du camo Fleştoyo, dilonoyith u zedqayde dhowele athro şaryo lfuth afusqone d’Emwotho Mhaydotho wu insiyativ Caraboyo du şlomo.

Bebzabno, u buyono da tlotho rişone makadeste dıklozım İsroyel dlımahto fayış ido cala narcotho Fleştoye, udmakılyo atedbire dıkmanqısi agade du şlomo kino.

Camgabıdathe, u buyono makadle i ulsoyutho dmisım fulhone sagiye laşan dmımte lışroye folitiqoye la krize dkımdawmi bu qlimo dilonoyith b’Suriya, Libya u Yeman lfuth afusqone du mawtbo di mşaynutho d’Emwotho Mhaydotho.

Bu huthomo du buyonaththe, Mako Cabdalla, Alsisi u Alkazimi makadlın i awyuthaththe camu athro du Iraq bu sutoro di moruthayde, di mşaynuthayde udi şalyuthayde mqabıl da hjome dı Turkiya.