22/01/2021

Simo i camaliye qamayto du lebo bi mditho d’Qamışli

Bu qlimo di Gozarto d’Bethnahrin d’Suriya, simo i camaliye qamayto du şuhlofo da waride du lebo.

 İ camaliyaththe simo me grub dilonoyo da osye, bi bethkrihe di cayno udu lebo dsim u futohayda bi mditho d’Qamışli.

 İ sictho du hulmono di Mdabronutho yothoyto du garbiyo udu madınho d’Suriya, hani kmo yarhe dımkamewola i mşatsonutho di bethkrihe di cayno udu lebo, u mamtela ucdo makinat dkibın teknik hatho, bnişo dmaxifo i casqutho du camo di Gozarto dıkmıjbarwo meqım dızze la mdinotho d’Holob u d’Darımsuq, leşan dsoyım tedawi da kewe yaqure.

Athmıl bıthır ma hedriyat du grub dilonoyo da osye, simo i camaliye qamayto du şuhlofo da waride du lebo l’farsufo d’cımre 60 eşne bi bethkrihe du lebo udi cayno bi mditho d’Qamışli. Lfuth i maqırhonutho dhule u mdabrono gawonoyo di bethkrihe Muhammad Cabde, i camaliyathe grışla hul 4şoce, wi aykanoyutho du kayiwo tawtoyo.

Lfuth Cabde, kmıntırste ba yawme dıbqamuthayna dmisım camaliyat l’farsufe hrene dkıtne kayiwe du lebo. Hathe i naqla qamaytoyo dıkmisım hawxa camaliye du lebo bu qlimo di Gozarto d’Bethnahrin d’Suriya, u meqım mathe belhude ba mdinotho d’Darımsuq, Holob u Hımıs kmisomowa.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…