Sniğartho Ebru Timtik mcafyo b’Stanbul

İ sniğarto Ebru Timtik, d’sayimo 238 yawme xıd protesto mqabıl di siyase qşitho dıkmaşyo i şultonutho du rişqutno d’Turkiya, nqilo ma haye.

 I sniğarto Timtik, adyawma mcafyo bi mditho d’Stanbul. Lu cufoyanoste hadırle ba mowat dıbnaynoşo u bi ithutho d’mınyono celoyo dı pwelıs Turkoye.

Ebru Timtik u Aytaç Ünsal dkıtne sniğre bu şutoso Halkın Hukuk Bürosu, mabdewolın taklitho du kafno cam ğer hawrone du fulhono dkıtne yasire ba hbuşye d’Turkiya. I taklithathe du kafno da 2 sniğre, mşahlıfo 5 bu yarho d’Nison dı şafıcina l’sawmo hol umawto.

Xıd hawyo cade b’Turkiya asniğrani dıthimi bi asirutho dcamu gabo semoloyo DHKP-C dkıtyo mnico b’Turkiya, hkimiwo l’hbuşyo yarixo ma thome di marhıbonutho. Bu sawmo dmabdewolın a 2 sniğreste tlıbwolın dmisım bethdino kino elo 14 bu yarhano, u bethdino du nomuso esonoyo rfıdwole u talab du terfiyathe.

Asniğre mdawamwolın u sawmathe u yawme dı hamşo dı şafıcina u şutoso da sniğre frıswole maqırhonutho u makadwole d’Timtik dkıtwa 42 eşne, nqilo ma haye bi bethkrihe b’Bakırköy, bıthır 238 yawme bu sawmo. Bi mıştawtıfonutho d’mınyono celoyo dıbnaynoşo, sim adyawma u cufoyo di sniğartho.

Elo i hothayda Barkın Timtik dkıtyo hiyaste sniğarto u bu hbuşyo d’Silivri, rfıdle u mqımdino u talab dhudro bu cufoyayda. U polis hjımleste calu ahıl, hawrone, a sanode di sniğarto d’nuriwo dmaydi i şladayde leşan dmitawbılo l’Çemevi u bıthır la bethqbure d’Gazi. Bu zawho du cufoyayda, sim mamle, Grub Yorum mqadamle zmirotho. Me gabo hreno u Mawtbo du camo Suryoyo bu buyono dıfrısle krıhle u qedomo di şultonutho tuxmonoyto d’Turkiya li sbutho di sniğarto Ebru Timtik.