SÖDERTALJE: GHS b’turgomo mahkele cali ulsoyutho di hdoyutho da fulhone bayn da gabe u şutose u citotho du camaydan

SÖDERTALJE, Swed — U benyono du froshezwo d’Suroyo TV dkıtyo bi mditho d’Södertalje bu Swed, athmıl sımle baytoyutho l’turgomo du diyalog dımtayıb mu gabo du Huyodo Suryoyo d’Suriya d’GHS calu dactid du camaydan u Suryoyo Othuroyo Kaldoyo Oromoyo b’Suriya, ucali ulsoyutho dmihaydi a’fulhone, bnişo dmisım u garanti da zedqe umthoye u athronoye du camaydan bu nomuso esonoyo hatho d’Suriya. 

U turgomano sim mşalo d’GHS u ferco d’Urifi Josef Lahdo dmıçğele bu leşono Caraboyo, umu mşalo da n’esore gawoye du Huyodo Suroyo d’Urifi ESU Yacqub Mirza dmıçğele bu leşono Suryoyo. 

Bu turgomano ste kıtwo şawtofutho ba mamle dsimi ma hadire umhın farsufe dmıştawtaflın bu darbo di dafo du nawlo d’Zoom. Ba mamle dsimi mahwın a’hzayotho mşahılfe dkito bi sbutho du dactid du camaydan b’Suriya, u aydarbo kibe dmithabti a’zedqayde b’gawıd du nomuso esonoyo hatho d’Suriya. 

Bebzabno, a’mtargımone kalın bu mamlaththe cali ulsoyutho di hdoyutho da fulhone bayn da gabe u şutose u citotho du camaydan, bnişo dmımte l’tahrazto mşawtafto dıkrışmo u dactid du camaydan b’Suriya, udkımthabto a’zedqayade b’şawyutho cama came hrene b’gawıd du nomuso esonoyo hatho d’Suriya. 

Camgabıdathe, a’mtargımone wa hadire ba mamlaththe makadlın ste dıklozım dmişatıs athro mdinoyo demoqratoyo b’Suriya i hathto lfuth u prensib di barmothoyutho, di kinutho udi şawyutho bayn da came kulle du athro, u tlıblın dmitıctarıf bi hiyoyutho umthoyto du camo Suryoyo, dmibayın u leşono Suryoyo xıd leşono ruşmoyo b’Suriya, udmitahwele u camaydan u zedqe dmawlıf a’şbile da madraşyotho bu leşonayde u emhoyo. 

Lu turgomano mıştawtafle kunoşo ma hfite u folitiqoye u kothube Suryoye dıkmahwın yasifutho li sbutho umthoyto du camaydan b’Suriya.