Sohdutho İzla Neriman Özgun Rucyo mathkıro ba falqe du athraydan Bethnahrin udan athrawotho di golutho

BRITHO – Bıthır mu fuqdono dhuwle u Mawtbo Umthoyo d’Bethnahrin bi egarthayde dla hadome ula noqufayde bkull duktho dbritho leşan dnufqi moro li hadımtayde di Sictho di Rişonutho-i Sohıdtayda İzla Neriman Rucyo, hiw ba salone uba citotho mkono lu camaydan’ste, dımqadım a buyoayde u dmathkır i ruho di Sohıdto.

Me 6 bu yarhano, mtayıb bu bınyono d’Suroyotv b’Södertelje caza wi iqartho wa hawrone di Sohıdto, mıstaqbelın a buyoye du camo wa kohne dhadiri’ste, maqımlın teşmışyotho cali ruhayda. Athmıl’ste bu salon di cito d’Mor Yahkub dan Nsibin dmaliwo camo, mtayıb tahrazto d’mamle, musiqi u qole citonoye lu iqoro di Sohıdto İzla. Wu ramhıl bcayni cito, gıdmisomo i slutho du cufoyayda bi mtaybonutho da 2 hsayo di marcitho.

Ba yawmotho dıbqamuthayna’ste, gıdmınqıl u fağro di Sohıdto l’Mıdyad leşan dmicafyo bu athro. Camgabe du Swed, b’Suriya ubu Cıraq’ste mathkıro i Sohıdto ubi cito d’Yuldath Aloho b’Hengelo d’Hollanda maqımle abuna qaşişo Yuhanun bar Saliba teşmışto cali ruho di Sohıdto wa hadome da şutose d’MUB mıstaqbelın a buyoye du camo u hiw lahmo cali ruhayda.

Bebzabno ba citotho d’Mor Yuhanun da Kfone b’Delmenhorst, Hamburg ubğer citotho u salone d’Almanya ubi cito d’Mor Yahkub bu kanton d’Ticino d’Swisra, maqımme a kohne teşmışyotho cali ruho di Sohıdto u sim caza ba salone da citotho ma hadome u noqufe d’MUB. Ba mamle dsimi’ste camgabe dhiw fako d’rahme cali ruhayda, mahke cala haye di Sohıdto İzla dkull naqla obowa mrodo lu teqwiyo du sebyono di athto, leşan i şawyutho beyn da ğense.