Suha Alnajjar mbayno rişonitho di sictho da tarmiyotho du Iraq

U rişwazire du Iraq Mustafa Alkazimi mbayanle hıdo athto mu camaydan l’wolitho rabtho bu haqlo di mdabronutho.

 Bu taro da şuhlofe rabe dıksamlın bu haqlo folhoyo u di mdabronutho, Alkazimi mbayanle Suha Dayud Alyas Alnajjar rişonitho li sictho athronoyto da tarmiyotho momunoye bu Iraq.

U rişwazire du Iraq Mustafa Alkazimi sımle şuhlofe rabe bu haqlo da woliyotho folhoye u di mdabronutho, baynothaye mnaqe notarrozo hatho l’Boğdod, rişono hatho lu bank qentrunoyo u rişono hatho li sictho di şafyutho awkith da dayone du bethdino.

Ubu taro da şuhlofani, Alkazimi mbayanle Suha Alyas Alnajjar rişonitho hathto li sictho athronoyto da tarmiyotho momunoye bu Iraq. Meqım mathe, Alnajjar kıtwola i wolitho d’mşawrono du rişwazire dcala sebwotho du momuno u da tarmiyotho.

Lfuth u tebo dıfrısla i dafo di fatıryarxutho di cito Kaldoyto d’Bobıl, u fatıryarxo Mor Rofayel Qadmoyo Luwis Sako, athmıl meqım mıdmitawdıci aşuhlofe dhawın bu haqlo da woliyotho rabe di mdabronutho, mıstaqbele bu qentrunayde u fatıryarxoyo bı Boğdod Suha Alnajjar.

Suha Alyas Alnajjar ma nabne di cito Kaldoyto d’Bobılyo, u şerşayda mi qastra d’Karamles mi daşto d’Ninweyo, u bebzabno yadıcthonithoyo bu haqlo du momuno u da tarmiyotho.