Suroyo TV komcayid u yawmo şatonoyo da 21 eşne

SODERTALJE, Swed — Ba dawsat dımhalaqwole u ağono di hirutho, 5 bu yarho d’Tamuz da 2004 kthuwole makthabzabno hatho, bu futofo du froshezwo qadmoyo du cameydan bu darbo du satelit. Suroyo TV dıbdewole dnofıq u logayde 4 bu yarho d’Tamuz u bıthır yawmo mabdewole bu frosayde du test, du çerobo.

U zabnano du çerobo dkıtwe bu yawmo şoctho, mdawamwole hol 10 bu yarho d’Teşrin u qamoyo da 2004 dsımwo ebe i Gala qadmoyto b’froso hayo. U bıthır mu zabnawo, mdawamwole u froshezwo bu frosayde u kyonoyo u hol adyawma’ste, kımdawım u froshezwo bu froso ubu tuyobo da tahrazyothayde a marduthoye, kenşoye, folitiqoye u tawdithoye dsımle.

Dilonoyith’ste bu nqolo da tebe, da gedşe uda şuşote ulsoye dkowın bıgawe du cameydan, yaste dkıtte asirutho bi sbutho du cameydan; mahwele u dawro dkibe dmıştace leşan u tenhiro u dhowe fatoho qum du camaydan u Suryoyo-Othuroyo-Kaldoyo-Oromoyo dkıtyo ba falqe du athraydan ubi golutho.

U froshezwo d’Suroyo dmahıtwole nişo d’maşmıc u qolo du cameydan lbritho u dımaqrıw a renyayde lhdode, şafıcwo bu yarho d’Konun u qamoyo da 2011 lu sistem du IPTV, u mhalaqwole dawse ulsoyto lu şuşoto ulu şuhlofo gawonoyo du frosayde. Bi cohnuthathe’ste, kımcaydina a 21 eşne du froshezwo lu camaydan kule dqodır dımdawım dımfarıç u dsonıd Suroyo TV.