Suroyo TV sımle maqıblonutho cam Wayne Marotto

Adyawma a matiboneydan d’Suroyo TV bi Gozarto d’Bethnahrin, laqın u malolo du koalisyon Emwothoyo dkobe ağono mqabıl da marhıbone d’Dacış bu Madınho Mescoyo-Wayne Marotto.

A matiboneydan bıthır ma şuwole gawonoye du ağuno mqabıl di marhıbonutho, mıdlın i hzaytayde cala hayle hayle folhoye du cameydan-MFS u calu ağuno dkobe u cameydan b’Suriya.

Bi lqaytathe u malolo du koalisyon Emwothoyo Wayne Marotto mfanele calu şuwolo-dmınyo i aykanoyutho harayto d’Dacış u mırle; Ahna harkena leşan d’matimina i şultonutho di marıhbonutho d’Dacış , dkbışwole arco xıdu athro d’Swisra elo bu qrobo dhulan cama şorikeydan b’Suriya-a Haylawotho d’Suriya Demoqratoyto u bu Iraq-u gayso wi peşmerga du qlimo d’Kurdistan, qadirina dımharırina a arcotho dkbışwole elo, Dacış kıtle i xasra hreto dkıtle krılyotho  dkıtne b’dukotho mşahılfotho bu Iraq u b’Suriya. Mawxa kımdawina bu ağunano dımqabıl di marıhbonutho dsımlın hawbe yaqure bu qlimo.

Calu şuwolo u snodo du koalisyon l’QSD Narotto hawxa mırle; Ahna xıd haylo folhoyo harkena lu snodo da hayle d’QASAD bu zayno bu lojistik u bkul mede dıklozım leşan u ağuno mqabıl d’Dacış. Elo u fusqono siyasi dhul ema u koalisyon gıdfoyış harke, a rişone dan athrawotho dkıtne bu koalisyon’ne elo mede ha tro midıc u athro d’Amerika hulucdo kobe ba milyare dollare mi madatho du athro xıd snodo lu ağunano dkowe cam QASAD mqabıl di marıhbonutho. Ahna harkena hul dmatimina Dacış kulonoyith.

Bebzabno Marotto mırle; U talabeydan mu camo di duktho, dhowe sanodo leşan dqudrina dmatimina i zıhniye samonitho d’Dacış. Bu huthomo di lqayto a matiboneydan mqadamlın lu malolo du koalisyon Emwothoyo kthowo calu makthabzabno du cameydan xıd duşno.