ŞUTOSE MUB EGARTHO-ABDULLAH ÖCALAN

A şutose du camaydan du Mawtbo Umthoyo d’Bethnahrin bi maqırhonutho dhiwolın b’Swisra bi mdito d’Zurich kmawdıci d’Abdullah Öcalan, hani qariwo l’25 eşne msiko’yo bi gzırto d’İmralı, bhdo hobuşto-hücre. Hani 2 ışne u falgeste kit acle teçrit yaquro u kmidoşi a zedqayde a noşoye u qonunoye, lıkmıtre dloqe lo a sniğrayde u loste i iqarthayde.

Bi maqırhonutho mşalıt bahro cali siyase tuhmonoyto du rejim d’Turkiya-di şultonutho d’AKP-MHP ubi rişonutho d’Recep Tayyip Erdoğan dıkmitaşyo mqabıl da came, da saqıbloye, nahire, udu kenşo demoqratoyo. Mawdıcste maşe siyase dha şıkıl, u kull naqla kmısko a Mşihoye, Ezidoye, Calawiye tahtu hboso, bnişo bnaqla hdo dmatimolın. Mabayın tahrazto dkıtyo cal asas du asimilasyon udu tenkiro.

Ba ışne haroyani i şultonutho d’AKP-MHP, bşıkıl rwiho kmıstacmılo a darbone du hboso u du cnufyo. Ba hbuşye, ba haqle di cyeşe kmisım taşniqe ba banaynoşo. İ kinutho, u qonuno wa zedqe dişi. U teçrit dıkmisım sistematik cal Abdullah Öcalan u cala yasire hrene d’İmralı, ktıryo dhowe kmirutho camu ray demoqratoyo dı Turkiya.

İ siyasathe kmıfrodo calu kenşo kule, u leşan kull noşo’ste dşole kmitazidi a hbose. A gelyunore wa folitiqoye dıknufqi mqabıl du teçrit, kmimodi yasire u kcawdi leşan dmaşlın u qolathe. İ mdabronutho, kmaşyo qrobo folhoyo u dilonoyo, bu qlimo kule. U kenşo, more da şuğlone wa saqıbloye hfite, kmisomi tahdit ma grube noqufe umi mafya bu qatlo.

Camgabe da folhe, du polis uda bethdine, a grube jihadist dıkmitaksi me Suriya, Afğanistan ume gawe d’Turkiya, kmitıstacmili ba cuqobe u ba şuğlone cjiqe. Calu medano kmitamır, ahna camgabe dıktulbina dmitaqım u teçrit wa tehqobe mqabıl di demoqratoyutho d’Turkiya udu Madenho Mescoyo, ktılbina’ste dlo frişutho dmitawde bu zedqo ubi hirutho da bnaynoşe kulle. Kmaczımina u ray gawonoyo dbritho uda athrawotho d’Urifi’ste, leşan da zedqe du barnoşo dfayti li harake u dmahti klayto mqabıl di şultonutho d’AKP-MHP, u dmitaqım u teçrit dkito cal Öcalan.

Bi maqırhonutho camgabe dıkmisım qroyto li awyutho ulu ağuno mşawtıfo mqabıl du teçrit-a talabani mawdıci. Dmitaqım u teçrit dcal Abdullah Öcalan, u dmıtre dloqe cama sniğrayde u cama farsufe di iqarthayde. Dmisım mkone leşan dqodır dımqadım a ftakarayde lu ray gawonoyo. Leşan dmışroyi a şuwole etnikoye u kenşoye b’Turkiya, dmitayıb lqoyotho cama mmathlone di şultonutho. Bnişo dmicadli a şartat du cwodo wa mkone noşoye dkıtle, dmiharır mi gzırto d’İmralı.