u_parlamento_d'urifi
26/01/2023

Şutose u tukose frişe, beynothaye ESU u ADFA, kotılbı mu Mawtbo d’Urifi d’mitarkiw tribunal Emwothoyo lu hkomo da marhıbone nuxroye d’Dacış

Ba casrowat d’şutose u tukose b’athrawotho frişe dbritho u acmaye’ste hol 15 farsufe u mşale idice b’haqle mşahlıfe, mdelın cal egartho dımşadro lu Mawtbo d’Urifi cali sbutho da hadome nuxroye dkıtne bu tukoso marhıbono d’Dacış. Bi egarthathe a şutose u tukose dıkm’athli a Ezidoye, a Mşihoye uğer, kımawdıci u ğamo dıktucni cali bsirutho di kinutho udu hkomo da marhıbone d’Dacış u m’akadlın cali ulsoyutho di mşatsonutho d’bethdino Emwothoyo.

26/01/2023

İ egartho ftıhto dımşadro meqım kmo yawme lu Mawtbo d’Urifi cali sbutho da marhıbone nuxroye dkıtne bu tukoso d’Dacış, mıdyo me hol 30 şutose u tukose da Ezidoye uda Mşihoye; beynothaye u Huyodo Suroyo d’Urifi-ESU, u şutoso A Demand for Action-ADFA. Camani’ste kito mınyono d’şutose da Ezidoye uğer tukose u farsufe idice dkıtne mşale d’şutose frişe dmawdaclın u snodathe li egarthate-xıd mathlo Nadine Maenza, Lord Alton me Liverpool, Baroness D’Souza, Dr Gregory H. Stanton wa star.

Bi egarthathe a şutose wa farsufe dımdelın tahta, mawdıc u ğamo dıktucni cali bsirutho di kinutho u m’akadlın cali ulsoyutho du terkiwo d’tribunal Emwothoyo wi sniqutho dkito dan athrawotho dkothın a marhıbone menaye, dım’amni u dımcadri a dıbhe. Bebzabno bi egartho griş u zuhoro calu quwolo dsim bu parlamento d’Almanya ucalu dcoro da marhıbone lan athrawothathe b’Urifi u dmıhkomi lfuth i maqırhonutho dımqadamwole u qoyumo Hollandoyo Pieter Omtzigt.

Bi egarthathe’ste mawdıc dıksundi i maqırhonuthathe d’Omtzigt u mahke bşıkıl rwiho cala hawbe barbroye dsımwole u tukoso marhıbono cala Ezidoye, Mşihoye uğer came bu Cıraq ubı Suriya u dheş kito ba mo alfayo dhrene dıkhoyın ba maşıryotho yaste dkobın ağuno leşan dmacişi ruhaye. Mqadım’ste tahınyotho l’Almanya cali mawdyonuthathe bu qtolğenso u mawdıc, dıksundi dmibayın bethdino Emwothoyo leşan u hkomo da hawbe du qtolğenso udan athrawotho dhukmi a marhıbone ba bethdinathe cala hawbe barbroye dsımlın.

Bi egartho kle cala nacime da marhıbone dlıklozım dmıthomi cala hawbe dsımme i emo u babathe, wa marhıbone wa sanodathe’ste lıkowe dmitahwelın mkono dmıstacmıli u sistem leşan dmaxlısi ma bethdine, cal da marhıbonani’ste heş kımşakli gzomo bıgawe du kenşo. Tlib mu Mawtbo d’Urifi dfolıh bi awyutho ubu snodo da Ezidoye, da Mşihoye uda came hrene dhawın dıbhe bu Cıraq ubı Suriya u dlo mitahwe darbo la marhıbone, dmaxlısi mi kinutho.