21/05/2022

SWED: Claymo Suryoyo qtil b’Örebro

Athmıl ba şoce d’casriye, qtılwo ha ma abne du cameydan bu zabno dkıtwe bi radoytayde qaloco bi şawtho d’Varberya d’Örebro du Swed. Lfuth i mawdconutho dmıdlan me Örebro, u claymano dkıtyo bcımro d’arbac u tlelthi eşne, claymo moro d’şuğlo dlatwole asirutho cam grobe mede.

ÖREBRO, Swed – Bu tebo dfris athmıl bu tbocofroso d’Örebro mawdıc da powelıs latimi l’gedşo d’radayto bi şawtho d’Varberga, elo bıthır mawdıc dmarıs buğre cal farsufo dkıtwe qaloco d’radayto hewarto dıkmahwıyo d’stiro b’dawmo bu gabo du darbo.

Bi mawdconutho dmıdlan me Örebro me farsufe dkıtlın idactho cali sbutho mawdıc dhın farsufe rawixe cal motor marıslın buğre calu qaloco di radayto dkıtyo ha ma abne du cameydan. U mnohnafşo dkıtwole şuğlo d’ruhe u mcawnono lu cameyde u mhaydarwo ruhe dmikalıl ba yarhani du qayto.

Bhaq da farsufe d’marıslın buğre calu mnohnafşo, latyo idico manne u polıs heş kısoyım cuqobe bi şawtho d’Varberya u kıtulbi mu camo mawdconutho en hzelın mede aw kudci mede calu qatlano dhawi. İ cito d’Yoldath Aloho Meryem dkıtyo b’Örebro mawdacla, da adyawma gıdhowe teqbilo da buyoe bi cito mi şoctho da şeth d’casriye huli şoctho da tmone.