22/05/2022

SWED: U Huyodo Suroyo d’Urifi hadir lumodo zawcoyo da Kurdoye d’Skandinavya

U mawtbo knuşyo da Kurdoye d’Skandinavya sımle u lumodeyde bi mdito d’Örebro du Swed. Bu lumodano u Huyodo Suroyo d’Urifi-ESU u ferco du Swed qrele u buyono dımşadarle lu lumodano.

ÖREBRO, Swed – Bu lumodano dımhadır bi mdito d’Örebro hadırle a şutose du ağuno da Kurdoye wa came şbobe dıkhoyın cam hdode ba athrawotho du madınho mıscoyo. Lu lumdano dıczımwo u Huyodo Suroyo d’Urifi mıştawtafwole Şabo Alan dı qrele u buyono d’ESU la hadire bu leşono Turkoyo.

U buyono mşarele ba melan: “Ahna u huyodo Suroyo d’Urifi u ferco du Swed ktilbina u lumodano dithxun di foyit bkaşirutho.” U buyono mdawamle ba melani: “Hawrone myaqre, u athreydan wi fnitheydan hawın u qentrun da qrobe u da qatre bu maktbzabno. Bi sbuthathe u athro dı Turkiya dkıtyo u bcelıdbobe da came bi yortutho dmıdle mi mamlaxto cuthmanoyto i mardutho du qtolğınzo kımdawamla ucdo ste cala came.”

“Bi zihniye di cuthmanoyutho hathto ksaymi qtolcame u kıbşi dukotho mşahılfe bgawe du athro u larwal mu athro. Mawxa a came d’Bethnahrin u du madınho mıscoyo dobina ido b’ido gıdmaklina a siyasat du shofo da came dıksaymo Turkiya. Be bzabno klozım dnıfqina moro la ağre dkıtlan bu athreydan u mawzdina a rohmaydan bı britho.”

U buyono dı qrele u mathlono du Swed d’ESU Şabo Alan mırle:

“Bu athro u larwal mu athro dlo furşono saymina a wahde kule wahde du ağuno laşan dqımrina mqabıl u bcelıdbobano u tuhmonoyo d’Turkiya. Bu dymyano kobina şlome lkulşxun ktılbinalxun kaşrutho, u ktılbinalxun yawmotho dhirutho.”