Tagliyotho mqabıl di tuxmonoyutho kruhi bıbritho

Ba casro alfayo dıbnaynoşo, mıştawtaflın li taglitho dımtaybo athmıl bi arişkoyto d’Amerika Woşington mqabıl di tuxmonoyutho udi frişutho dkito u athro. I taglithatheste, kmifaşqo i taglitho rabtho dsimo holucdo b‘Amerika.

 Elo u hfuxyano mqabıl di tuxmonoyutho lo belhude b’Amerika simo. Mtayıbste athmıl tagliyotho ba arişkoyotho d’Urifi, b’Australia, b’Kanada, b’Qore i Taymnoyto uğer.

U qatlo du claymo komo George Floyd me polis Amerikoyo meqım 12 yawme, kımdawım dı xolıq hfuxye bu athro. Athmıl, sim naqla hreto tagliyotho bı mdinotho frişe d’Amerika mqabıl di tuxmonoyutho udi frişutho bu slogan; Black Lives Matter awkith; A haye da komeste kıtte ulsoyutho.

Bi arişkoyto Woşington DC, simo i taglitho rabtho dkulle dmıştawtaflela ba casro alfayo dıbnaynoşo. A hayle di mşaynutho du athro, qtıclın u darbo da mtagliyone dabici dımdawmi lu Qusro Heworo.

A tagliyothani mqabıl di tuxmonoyutho, simiste bı mdinotho frişe d’Urifi, b’Kanada, Australia u Asia. U wahdo du parlamento d’Britania, maliwo camo, walaw kımdawım u qento du virus di Corona. B’Sidney, Melbourne ubı Brisbane d’Australia, krih u qedomo di şultonutho lu camo şerşoyo du athro.

Bebzabno mtayıbste tagliyotho bı mdinotho frişe d’Fransa, Almanya, Spania ubı Kanada, mahwele u rişwazire Justin Trudeau i awyuthayde cama mtagliyone. Cayni şıkıl tagliyotho, simiste b’Neapal, b’Qore i Taymnoyto uğer.