Taşdarto mşawtafto me ESU ume mathlone da tukose da Callawiye b’Turkiya, sımla socurutho lu fatıryarxo d’Qiliqya di cito da Rom Orthodoksoye Mor Bartholomeo

STANBUL – Cal ışme du Huyodo Suroyo d’Urifi-ESU Tuma Özdemir wu mathlone d’şutose u tukose frişe da Callawiye b’Turkiya, sim athmıl socurutho lu fatıryarxo di cito da Rom Orthodoksoye Mor Bartholomeo bi fatıryarxutho d’Fener b’Stanbul. Hathe inaqla qamayto dıkowe hawxa lqoyto cami qadişuthayde wi taşdarto d’ESU uda Callawiye bşıkıl rwiho mahkela cali aykanoyutho harayto d’Suriya wu haşo rabo dıkcoyış u camo mcal fothe da hawbe udu cnufyo dkowın cala qalilotho-a Druz, Callawiye wa Mşihoye ma hayle d’Darımsuq ba mdinotho dkıtne calu sforyamo-xıd Tartus, i Latqiye uğer.

Mşalo ma Callawiye mırle; Ba mo alfayo dıbnaynoşo kmitawfıqi ma dukothathe u kmisım gunhe sistematik wa qalilotho kıfayti b’maşıqlo ğalabe casqo. Leşan dmitaklın a gunhani, fsıqlan dloqina a rişone ruhonoye b’britho kula leşan dmitaşmıc u qolaydan u tlıblan’ste mu fatıryarxo dhowe sanodo dmitaklın a gunhani dcala qalilotho. Bebzabno mawdıc di taşdarto kınutro xabro leşan dluqyo’ste u Papa du Vatikan Mor Fransis.

U mathlono d’ESU Tuma Özdemir’ste grışle u zuhoro u mırle; Falge di iqarthaydi b’Suriya’yo. A Mşihoye wa qalilotho hrene kıfayti b’haşo rabo malye cnufyo u rdufye. İ aykanoyuthathe b’Suriya, kım’athro lo belhude cala Mşihoye ucala Callawiye, elo cala qalilotho kulle. U camaydan kull dkothe zıttır kınoqıs mcal fothe di aykanoyuthathe. Calathe kıtlan sabro di socuruthathe’ste, dımamtıyo şuhlofo msimono cam ruha.

Bu mamlo dsımle i qadişutho d’Mor Bartholomeo mırle; Ludcina’wo dkowe hawxa rdufye qaşye. Gıdmnasena dsaymina u mede dkothe menayna, leşan dmitaklın a hçomani. U fatıryarxo mawdacle, dhawile meqım zabno ytawto camu rişqutno Turkoyo Erdoğan cali sbutho d’Suriya u mırle li taşdarto; Nutrina’wo mi mdabronutho hathto dnufqo moro la qalilotho u tlıbwoli me Erdoğan dım’athır cali mdabronuthathe.

U fatıryarxo mahkele d’Erdoğan’ste mırwolele; Lo tucnitu ğamo, hzelox da Mşihoye b’Suriya qadiri dımcaydi u cedo du Mawlodo?!. U fatıryarxo bıthır mırle; Elo bıthır kmo şabo, şamicina u mede dhawi bi Latqiye. Bu huthomo di ytawtathe’ste, mqadamla i taşdarto şukono li qadişuthayde u camhıdode, azzın bıthır kulle li cito u tlib me Aloho dmakle u qtolcamano.