Taşdarto Suryoyto simla socurwotho la makthbe d’senatore d’Amerika

WOŞİNGTON – Lfuth i mawdconutho dmatilan me Amerika, taşdarto dimşaqlo mu mathlono du Huyodo Suryoyo b’Amerika Robert Juhanon u mathlono d’şutoso di haymonutho aminoyto-awkith “Enduring Faith”- u rişono du Mawtbo Umthoyo Suryoyo Bassam İshak, cam Martha Hudson mu Tukoso şaryo di Hirutho Emwothoyto da Tawdithoyo, sımla ba yawmotho dşafıcina 22 socurwotho l’mşale frişe d’Amerika.

A socurwothani simi la makthbe d’senatore frişe, mşawrone u hadome frişe du Mawtbo tahtoyo di kongre d’Amerika, leşan dgurşi u zuhoro cala qetre ucala dyoşe dkowe cala zedqe noşoye b’Suriya. İ taşdartathe mawdacla dkull şuhlofo folitiqoyo dgısaymo Amerika b’Suriya-dilonoyith bi sbutho du texifo da tedbire, snodo la zedqe noşoye uli hirutho tawdithoyto’yo.

Ba socurwothani, abico i taşdarto dımşalto bahro calu ğamo dıktucni a qalilotho d’Suriya wi sniqutho dkito du athro, dmişakıl ma camayde kulle. İ taşdarto mırla; U dactith d’kenşo pluralistik, masro’yo b’reforme şroro ulo me siyase dkıtyo u nişayda belhude dmaqwıyo a hayle tuhmonoye. Bu tarano’ste, i taşdarto mqadamla tahwitho d’nuqze mbayne; 

1. A hayle powlıs d’Suriya klozım dhowelın mşalutho u dxudmi a came kulle dlo fırşono. A ğrobe xıd Hayıt Tahrir al Şam, klozım dmitaqimi ma nuqazyotho du duyoqo.
2. Klozım dmisım reform bu nomuso esonoyo d’Suriya leşan u garanti da zedqe şawye da bnaymothoye kulle, dmitaqimi a qonune di frişutho-mathlo di rişqutnutho dfayşo masırto bi tawditho.
3. Dmıcwıd mqabıl du dcoro da hayle marhıbone u tuhmonoye qaşye-xıd Dacış uğer dıkmnasın dımaqwın u haylathe. U teqimo da tedbire d’Amerika klozım dhowe bu tehito d’şartat qrihe bnişo dmıkle qum da haylani u dlowe hile u teştcınye cala Mşihoye ucala Callawiye ucala dukothathe.

Griş u zuhoro cala egrotho dımbarbızi mqabıl da Mşihoye dıkmıçbori dımşahlıfi i tawdithathe en dlobın kmoyutho celoyto d’zuze. Calathe grışla i taşdarto u zuhoro di kongre calu qentano dkito b’Suriya u tlib sutoro la qalilotho mqabıl da siyasatani dkowın bu athro