25/01/2023

Taşroro cali aykanoyutho da Mşihoye dbritho grışle u zuhoro cali siyase dıkmaşe u rejim d’Turkiya bnişo dkobış a dukotho du camo Suryoyo

Fris taşroro cali aykanoyutho da Mşihoye b’athrawotho frişe dbritho calu yarho d’Konun u qamoyo da 2022 u kle dilonoyith cala Mşihoye b’Suriya, Armenia u Nigeria. Gatestone İnstitute, kull yarho kıforıs taşrore cala rdufye, calu cnufyo ucala qatle da Mşihoye b’athrawotho frişe dbritho.

25/01/2023

Raymond İbrahim, frısle u taşroro du yarho d’Konun u qamoyo da 2022 dcala Mşihoye dbritho. Bu taşrorano’ste bşıkıl rwiho, rizi an ışmone d’athrawotho frişe dbritho dıkhoye ebeye Mşihoye xıd mathlo; Nigeria, Mısır, Sudan, Çezayır, Armenia Bangladeş, İndonesia uğer wa rdufye dsimi cala Mşihoye u kmirozi a hawbe barbroye dsimi aclaye-cala citotho dmawqıdi u dımfarqıci uğer.

Bu fosuqo du taşrorano dcal Suriya, u kathowo Raymond İbrahim grışle u zuhoro cali siyase dıkmaşe u rejim d’Turkiya bnişo dkobış a dukotho du camo Suryoyo, Ezidoyo u Kurdoyo bu garbay madınho d’Suriya ubu garbyo du Cıraq. Bebzabno friş duktho cala hawbe dsimi mqabıl di noşutho ba hçome, ba htofe uba qatlani dsımla Turkiya wa noqufayda me 7 bu yarho dşafıcina uholucdo.

Bu taşrorano mawdıc’ste, d’Turkiya sımla me 20-25 bu yarho d’Teşrin u haroyo uholucdo, hol 2.500 hçome cala dukotho du garbyo d’Suriya dkıtne bu duyoqo di Mdabronutho yothoyto uda dukothani’ne dıkhoyın ebeye a Mşihoye wa qalilotho hrene. Bu taşroro griş u zuhoro cal htofe, cala qatle dhawın wu tehriwo du bınyono tahtoyo du qlimo u calathe mahıt remzo d’zuhoro du qtolğenso. A hayle di naşfe d’Turkiya wa marhıbone du Gbino d’al Nusra kıdayşi a zedqe noşoye u kımaşın agenda du terkiwo d’xilafe bnişo dmıqşoci a qalilotho tawdithoye mi duktho.

U rişono du şutoso Genocide Watch-Gregory Stanton mırle; Turkiya, kenşo da qtolğense’yo u sımla mınyono celoyo d’qtolğense bıgawe du makthabzabno. Turkiya mqabıl da Mşihoye’yo u mnasela hol dathi mena, dquşco Mşihoye. Bebzabno bu taşrorano mathkır u mamlo du malolo catiqo d’QASAD Kino Gabriel dmahkele cala şıkılat da qrobe dsimi cala Mşihoye b’Suriya mu zabno du rejim d’al Asad dabıc dsoyım u camo kule Caraboye u aydarbo naqıswo u mınyono da Mşihoye ban 1950 l’12 ba mo u bıthır naqla hreto bu mathyo d’Dacış wu ucdo’ste Turkiya bu snodo dan Ahunone Maşılmone uğer ğrobe qaşye, kımnasın dmatimi u camaydan wa Mşihoye hrene.