24/05/2022

Tebe b’qfisutho: cito d’Mor Yahqub Ticino simla tuyolo la yaqrotho, ytawto Bruksel bayn Paşinyan u Aliyev, u xer

YTAWTO BRUKSEL-MİCHEL PAŞİNYAN U ALİYEV – A ytawyotho bayn lu athro d’Armenya u Azerbaijan kımdawmi bi mıscoyutho du Huyodo d’Urifi. Be bzabno a saqıbloye du athro d’Armenya kımdawmi ba tagılyotho dıksaymi mqabıl da dawsat dıkmhalıq u rişwazire Nikol Paşinyan.

TEŞCİTHO CAL İQARTHO ARMINOYTO BU CIRAQ – Bı taşroro dfris bu tbocofroso kenşyoyo, kmitahke cali teşcitho d’iqartho Armnoyto aydarbo bıthır mu Sayfo dhawiwo aclaye bi şato da 1915 mi mamlaxto da Cuthmanoye dhawi celtho l’golutho rabtho du camo bu Madınho Mescoyo.

CİTO MOR YAHQUB TİCİNİ SIMLA TUYOLO YAQROTHO – İ sicto du Mawtbo di cito d’Mor Yahkub d’Tiçino d’Swisra, mtayabla yawmo du tuyolo lu camo, bıthır ma tarte ışne dşaficiwo bi Corona dlo mıqdar’wo dmıltım lıhdode. Bu yawmano u camo-rabe, zcure, neşe u gabre latimi u fsihi camhıdode ba teştcınye ubu zmoro da qole da yolufe hola şoce dcasriye.

QASAD FUNOYO ZUHORO HÇOME TURKİYA – A Haylawotho d’Suriya Demoqratoyto hulin funoyo la gzome du rişqutno d’Turkiya, dkobıc kobış hın man arcotho di Mdabronutho yothoyto. QASAD mırle; Ahna lo mşahlaflan i klayto dkıtwolan elo dothe Turkiya dsaymo hçome, hadirena dımdafcina ruheyna.

İLHAM AHMAD TURKİYA KIMAŞYO QTOLĞENSO – İ rişonitho di sicto mşablonitho du mawtbo d’Suriya Demoqratoyto İlham Ahmad bi maqırhonutho dhula mırla; Turkiya ba hçome dıksaymo cala arcotho u qıryawotho di fnitho d’Tel Temer latyo frişo mu qtolğenso dkito bi siyase d’Turkiya dıkmaşyo mqabıl da came.

HİKMAT HABİB MAQIRHONUTHO TAHRAZTO ERDOĞAN – U rişono zawgoyo di sicto sucronoyto du qlimo di gozarto d’Bethnahrin Hıkmat Habib bi maqırhonutho dhule mırle; Erdoğan kıtle tahrazto bişto dkobıc markıw a galwoye dkıtne b’Turkiya ban arcotho dkıtne kbişe mi şultonutheyde  b’Suriya.

HAÇ AL CARAB KNUŞYE CAMA CAŞIRYOTHO – U rişono zawgoyo da esore da Haylawotho d’Suriya Demoqratoyto Haci Carab bi mawdconutho dhule mırle; Bu zabno haroyo a ytawyotho u knuşye dkowelan cama caşıryotho Carboye, u nişathe dmitarku haye mşawtıfe beyn da came dkito bu qlimoyo. Be bzabno dı qudrina gurşina u zuhoro cala siyasat bişe dıksaymo Turkiya mqabıl da came.

YURDNON ĞAMO İTHUTHO İRAN B’SURİYA – U athro d’Yurdnon mawdacle dıktocın ğamo rabo calu froso da milişyat du İran bıgawe d’Suriya u cala thume dkıtle cam Suriya, bıthır mu groşo dhın ma haylawotho d’Rusya me dukotho mşahılfotho d’Suriya.

FALOHE QUBCE HEWORO-CAMO FAQİRO B’SURİYA – İ mtakasto du sutoro mdinoyo d’Suriya dıkmidoci ba kubce heworo mawdalın d 90 ba mo mıu camo d’Suriya khoye faqirutho. İ celtho di faqiruthathe dıkhoye u camo d’Suriya u tehriwo du bınyono tahtoyo du  athro ma siyasat du rejim u d’Rusya dcam hıdode’yo.