Tebe b’qfisutho: Fateryaxo Mor Younan b’socurutho li Swed, Mor Awa Royel socurutho Sydney, u xer

FATIRYARXO YOUNAN III SOCURUTHO LU SWED: İ qadişutho du fatıryarxo di cito Suryoyto Qatholiqoyto Mor İğnatiyos Yusuf III Yunan, sımle athmıl socurutho şlihoyto lu Swed, bnişo dkole cali aykanoyutho di marcithayde. Fatıryarxo Yunan bu şuroyo di socuruthyade, laqi rişone u kohne d’citotho mşahılfotho du Swed u menyono d’rişizgade u rişone d’şutose du camaydan; beynothaye u mdabrono du froshezwo d’Suroyo TV Yahkub Mirza.

MOR AWA ROYEL SOCURUTHO L’SİDNEY: İ qadişutho du fatıryarxo di cito d’Madınho d’Othuroye Mor Awa Roel, mabdele socurutho şlihoyto li marcithayde d’Australia, u kmıntır di socuruthayde dımdawmo kmo şabe. Hathe i socurutho qamayto’yo dıksoyım i qadişuthyade mu zabno dımnaqe fatıryarxo hatho di cito d’Madınho d’Othuroye dkıtyo u qentrunayda bi qastra d’Caynkawa bu garbiyo du Ciraq.

ŞUTOSO ZENOBİA-HÇOME TURKİYA: A gunhe wa dyoşe d’Turkiya ba fenyotho du garbiyo d’Suriya, kull dkothe kzaydi, ubi haraytathe, mafırla Turkiya hedor d’40 foqucotho cali fnitho d’Mabuğ. Calathe, u Kunoşo da Neşe d’Zenobia tlıble mu kenşo Emwothoyo, dnofıq mqabıl da dyoşani d’Turkiya, u dsoyım u sutoro da mdinoye.

LEBNON İTTİFAQ HATHO EM: Lebnon u Emwotho Mhaydotho mdelın qyomo dmitazidi a tarmiyotho wa tahrazyotho du quyomo. Cali sbuthathe, hın ma mşale Lebnonoye mahwelın dkıtlın sabro dhowın a rişone folitiqoye mcadrone, bu tefito da tarmiyothani la haye bnişo dmitawfıq u athro ma krizayde.

ŞEX MAQSUD FTİHO ME HATHO: Bıthır mıd şafıc yarho calu tuwoqayda mu grub folhoyo rbicoyo du rejim d’Suriya, athmıl maşfıc 32 tonat d’qamho li şawtho d’Şex Maqsud bi mdito d’Holob.

RUYSA KIMDAWMO U MHOYO B’UKRAİNA: Rusya sımla hçomo cali mdito d’Kiev, bu zabno di socurutho dsımwole u notarrozo gawonoyo d’Emwotho Mhaydotho li arişkoyto. Ukraina mawdcala du medano haqara’yo lu tukoso Emwothoyo. Camgabıdathe, an athrawotho du macırbo kımdawmi bu snodathe l’Ukraina bnişo dhowela haylo dnufqo mqabıl da hçome d’Rusya

QETRO GALWOYE BELARUS U POLONA KIMDAWIM: İ mdabronutho da thume d’Polonia, mawdacla d’zıttır me arbcalfo galwoye mnasewolın mu şuroyo di şatathe, dşufci b’şıkıl lo qonunoyo man arcotho d’Belarus l’Urifi.