Tebe b’qfisutho: İqartho Tel Jumca liqnufqo mi qritho, Fateryaxo Mor Younan qurobo alohoyo bu Swed, u xer

MOR YUNAN SOCURUTHO CİTO SWED: İ qadişutho du fatıryarxo di cito Suryoyto Qathuliqoyto Mor İğnatiyos Yusuf III Younan dkıtyo b’socurutho şlihoyto bu Swed, sımle’ste socurutho li cito du cameydan dkıtyo b’Akalla d’Stockholm. Ramhıl yawme d’Huşabo bi şoctho ba şeth dbıthır me falge d’yawmo, gıdsoyım u qudoşo di citathe dkıtyo ışma-i cito da Şlihe.

İQARTHO TEL JUMCA LIGNUFQO Mİ QRİTHO: Bı Tel Jumca bi fnitho du Xabur, iqartho Armnoyto dfayişo bi qritho kımmo; Ahna lıgnufqina mi qritheydan cıl ma hçome dıksaymo Turkiya wa marıhbonayda, dkıtyo athro dkıtle makthabzabno catumo malyo gunhe-xıd mathlo u Sayfo u ğer.

HİKMAT HABİB FUŞOQO QYOMO KENŞOYO: Bi maqırhonutho dhule u rişono zawgoyo du Mawtbo Nomusoyo di Gozarto d’Suriya Hikmat Habib mırle; Bu Qyomo Kenşoyo d’driş beyn da şutose di Mdabronutho yothoyto kulle, a barmothoye gıdmıstafıd mene folitiqoyith, momunoyith u marduthoyith zıttır me meqım.

İRAN TEQWİYO İTHUTHO FOLHOYTO B’SURİYA: Luth u tbocofroso qlimoyo d’Raqqa, a milişyat du iran, kımaşın fulhone leşan dmarkıwi u haylathe zıttır bi fnitho u calathe nqilın zayne yaqure bnişo dsaymi u sutorathe u dobın funoyo la hçome dhowe aclaye. Mu yawmo du qrobo dımşarele b’Suriya, Tehran mahwela dkıtla haylo bu athro u gıdhuwyo falqo mu qrobo gawoyo d’Suriya.

BUYONE CALA QTOLCAME DIKMİSOMİ B’SURİYA: İ wazirutho di baroyutho d’Amerika wa Haylawotho d’Suriya Demoqratoyto krıhlın a qatle barbroye dsımlın a muxabarat du rejim d’Suriya mi şato da 2013 ba hbuşye du athro. Ba maqırhonwotho dfrisi, tlib dmıhkım u rejim du rişathro cala hawbe barbroyani dıkmdawım b’Suriya.

KOMİSYON GUBOYE LEBNON-ZUHORO HİLE: U rişono gawonoyo di Sicto da guboye d’Lebnon Nadim Almalık, bi mawdconutho dhule lu tbcocofroso mırle; Kito casqwotho u tarpılyotho ğalabe qum da guboye du athro. Bi mawdconuthayde Almalık mırle; İdicoyo dba guboye dgıdmisomi cal qariwo bu athro, gıdmisım hile u ahna xıd Sicto’ste, latlan mkone dım’athrina wi şultonutho lıkmahıwyo yasifutho bi sbuthathe.

BLİNKEN MAMLO-QYOMO ZAYNE NUKLEER: U waziro di baroyutho d’Amerika Antoni Blinken bu buyono dfrısle mırle: A zayne kimyawi kobın husrono li noşutho, u mawxa lıklozım dan athrawotho dhowelın u şıkıl da zaynani. Blinken mawdacle, dhınne xıd athro kıbci dmanıqsi a zaynani leşan dlowe husdrono li noşutho.

U MARHIBONO BEATLE HKİM CIMRE KULE HBUŞYO: U bethdino federaloyo d’Amerika hkımle u marıhbono Beatle cımre kule lu hbuşyo, cala hawbe marıhbone qaşye dsımle b’Suriya bu zabno dkıtwe cama marıhbone d’Dacış. U marıhbonano dkıtle barmothoyutho d’Britania, nahıtwo l’Suriya u mharabwole cama marıhbone hrene d’Dacış u sımwole hawbe barbroye.