Tlib ma hayle rabe dmaklın ahçome dıkseymo Turkiya calu athro d’Suriya

U tahlufo di rişonutho zawgoyto du mawtbo mşablono du garbiyo udu madınho d’Suriya Josef Lahdo, mzaharle mu dcoro du tukoso marıhbono dı Dacış la haye bu zabno dıkqoşın ahçome Turkoye cala fenyotho dı Derik u d’Zarkan.

Camgabıdathe, u malolo da haylawotho d’Suriya demoqratoyto d’QASAD Aram Hanna sımle qroyto la hayle emwothoye kulle dkıtne mathrone calu kriz d’Suriya, dmahwın i klaytaththe mqabıl da hçome dıksaymolın Turkiya cala came du garbiyo udu madınho d’Suriya.

Turkiya ba zabne haroyani maqşela a’hçomayda cala fenyotho du garbiyo udu madınho d’Suriya, uba hçomani mıstacmela tayisyotho dlo pilot, marmaşla a’krulyotho dmaxie dkıtla, u qtila menyono d’mdinoye ba fenyotho dı Tel Tamır ud’Zarkan dıkfırşi a’haylawotho d’QASAD ma grube çatawiye marıhbone.

Cali sbuthathe, u tahlufo di rişonutho zawgoyto du mawtbo mşablono du garbiyo udu madınho d’Suriya Josef Lahdo, bi maqırhonutho dhule l’Suroyo TV mawdacle da hçome dıkmisomi cala fenyotho du garbiyo udu madınho d’Suriya tehdid qrihoyo la came di duktho, dlonoyith a’hçome dıkmisomi cal Tel Tamır u Zarkan. Lahdo mırle “a’hçomani kmarmışi ukmazidi u haylo da krulyotho damixe dı Dacış, du rejim udı Turkiya. A’krulyotho dkıtne masre cam Turkiya lıqadiri drımşi, u mawxa ste kmisım hçome calu garbay madınho d’Suriya, laşan dmıftıh u darbo b’qamuthıd da krulyothani”. Lahdo maglele ste dı Turkiya kmıstacımlo u şıkıl du qrobo di nafşo, mawxa ste ksaymo i propaganda da gube çatawiye bnayqyomayda, ukımdacyo dkul dkothe kımqadmi b’gawıd da fenyotho di mdabronutho yothoyto, bnişo dfırsi u zuctho ba lebawotho da comure mşayne di duktho.

Camgabıdathe, Lahdo tlıble ma n’athrawotho Urifioye u macırboye dkıtne m’athrone dsaymi u mede dıknofıl aclaye, bnişo dmitaklın a’hçome Turkoye dkımhadıdi a’haye da barmothoye wi mşaynuthaththe.

Mxasra hreto, u malolo da haylawotho d’Suriya demoqratoyto d’QASAD Aram Hanna bi maqırhonutho dhule l’Suroyo TV, mamtele lubolo dı Turkiya kımmathlo u bceldbobo makthabzabnoyo la came di fnitho, baynothaye a’Suryoye Othuroye dınhiri ba qtolğens dsimi aclaye. Hanna makadle ste dıklozım a’came du garbiyo udu madınho d’Suriya dhowelın tuxlono ba haylawotho d’QASAD dkıtlın u haylo wu mkono dnıfqi mqabıl da tarmiyotho di mıştacımronutho dı Turkiya.

Bebzabno, Hanna mzaharle mu qento du nfoqo da tukose marıhbone ba fenyotho d’Rişcayno, Tel Abyad u Cafrin cal dkibın i arcutho dıkşuyo la marıhbone d’hoyın ebaye. U malolo d’QASAD tlıble ste mu kenşo emwothoyo uma n’athrawotho dkıtne m’athrone bu kriz d’Suriya, dkırhi a’hçome dıksaymolın Turkiya cala fenyotho du garbiyo udu madınho d’Suriya, udımhalqi dawsat msimone dkibın dımşabli a’yuthrone da came di fnitho.