Tlib me Joe Biden dlo foyış şalyo mqabıl da gunhe dıkseymo Azerbaijan cam Turkiya

A mşawrone du rişono d’Amerika u du rişqutno d’Turkiya, hawilın droşe camhıdode bu telefon cali aykanoyutho d’Qarabax, d’Suriya u d’Afğanistan.

 Bebzabno cali sbutho d’Qarabax, tıre ma hadome di kongre d’Amerika tlıblın me Joe Biden, dlo foyış şalyo mqabıl da gunhe uda hawbe dsımla Azerbaijan u Turkiya cala mdinoye du qlimo.

U kriz d’Nagorno Qarabax, i aykanoyutho harayto d’Suriya, d’Libya u d’Afğanistan, hın ma sebwotho dıdrişi beyn du mşawrono du rişono Amerikoyo Jake Sullivan udu rişqutno Turkoyo İbrahim Kalin. Cali netiçe da droşani dhawın beyn da 2 mşawrone, lo fris mawdconutho wu Qusro Heworo’ste bu tebo dfrısle cala droşani, lo mbahaswole dmıdlın i sbutho d’Qarabax li ido.

Elo mawdıc, ba droşani m’akadle Sullivan lu bar’amnayde, u mabco dkıtla i şultonutho d’Joe Biden dıbınyo esore mawthrone beyn Woşington u Ankara.A cuqobe dsımlın a hayle d’Azerbaijan bu snodo d’Turkiya uda marhıbonayda d’Suriya calan Armınoye d’Qarabax, xlıqwolın hfuxye Emwothoye u tlıbwo baroyo dmitaklın a hawbani.

Elo Amerika heş bqrihutho lo mıdwola i sbuthathe li ido walaw a folitiqore du athro tlıbwolın mi şultonutho d’Trump dımaklıyo u qrobano. Ucdo’ste 2 hadome hrene di kongre d’Amerika mu gabo Demoqratoyto Jackie Speier wu Adam Schiff, sımlın qroyto li şultonutho d’Biden dmaqım i şalyuthathe dhawila Amerika mqabıl d’Azerbaijan u d’Turkiya ba hçomathe cal Qarabax ubebzabno, dmaklıyo u snodo folhoyo dkobo lu gayso d’Azerbaijan.

Camatheste a 2 hadome di kongre mawdaclın, d’Amerika klozım d’dorşo me hatho u şıkıl da esore mzawre dkıtla cam Turkiya bu zabno du rişqutnayda Erdoğan lıkmyaqır a yuthrone d’Amerika elo kımşaçıc u kısonıd a marhıbone d’Suriya bu haqlo folhoyo ubu qrobo dmaşelın b’Qarabax. Bebzabno a zawcani d’Turkiya bıgawe d’Suriya, huwlın husrono la yuthrone d’Amerika u mahıtla a folhayda bu qento.