06/12/2020

Trump hule amro dmıgroşi a folhathe me Somalia

U rişono d’Amerika Donald Trump, huwle amro dmıgrış bu şuroyo di şato dıbqamuthayna sahmo rabo ma folhe Amerikoye dkıtne b’Somalia.

 A folhe Amerikoye dkıtne b’Somalia, mcadriwo a hayle folhoye bu ağuno mqabıl du ğrub marhıbono d’al Şabab.

 Bi maqırhonutho dhuwla Pentagon mawdacla du rişono d’Amerika Donald Trump, huwle amro dmıgroşi a hayle Amerikoye dkıtne b’Somalia bu şuroyo di şato da 2021. Adyawma kito hol 700 folhe Amerikoye b’Somalia u kımdarşi a hayle folhoye d’Somalia, a hayle dilonoye d’Danab u kımcadrilın bu ağuno mqabıl da ğrobe marhıbone d’al Qacida u du ğrub d’Al Şabab.

Calu amrano d’Trumpste xliq ğamo, du groşano da folhe Amerikoye kibe dmadcıf a hayle folhoye bu ağuno dkobın mqabıl da marhıbone u dtore tathir mrimono cali aykanoyutho di mşaynutho du athro. Elo Pentagon kımawdıco, gıdturyo mınyono dfolhe Amerikoye b’Somalia leşan dmidawım u ağuno mqabıl da marhıbone.

A folhe hrene dgımroşiste gıdmınqoli lan athrawotho şbobe d’Somalia leşan u duyoqo da thume. A folhe dan athrawothaniste gıdqudri bu şıkılano dmahti u yuqrathe calu ağuno dkobın mqabıl da hayle tuxmonoye u marhıbone.

Pentagon mawdacla, u şuhlofano latyo şuhlofo di siyase d’Amerika wu ağunaydan gıdmdawım mqabıl ğrube marhıbone dıkmşakli qento li mşaynutho dı britho. U groşo da folhani me Somalia, gıdmisım bu taro du plan dımbayanla Amerika bu groşo dı sahmo ma folhathe me Almanya, Afğanistan u mu Iraq.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…