Trump mdele b’4 Tamuz i paketa di butçe athronoyto

WASINGHTON — Bıthır mu droşo umu quwolo dsim cali paketathe di buçe d’Trump, mawdıc b’fırşono ğalabe nacimo ubı hfuxyo ma hadome di kongre, fayito athmıl bi harayto  i paketathe ba qole d’218 E, u 214 Lo. Bu dumyano, maqbılo i butçe du rişono Amerikoyo bu yawmo dabıc-athmıl 4 bu yarhano dkıtwe u yawmo umthoyo.

İ paketathe dıkmişaklo me alfo warqe bıthır mıd mıdyo’ste me Trump, gıdşuhfco hanaqla bu nomuso du athro u lfuth Trump, hathe i paketa rabtho kulle dfayito u dmıdyo bu athro’yo u kımşaklo me fusqone, du tenqiso di madatho da catire, dmitahwe yuqro rabo lu duyoqo di mşaynutho du athro, dmitaklıyo i golutho l’Amerika, dmitanqıso i siğorta du kewo uğer.

Wa şuhlofe kulle dsımwole u rişono catiqo Biden, maqimile Trump mi holo. Fluth hın mbahnone i buçathe i hathto, gıdmaclıyo u dayno rabo dkito calu athro u dıkmote l’3.300 milyare dolare u kito qento, dhol 12 milyone Amerikoye dfayşi dlo siğorta du kewo. Bu taro da şuşotani’ste, mawdıc d’Donald Trump mdele egrotho d’zuhoro l’12 athrawotho frişe leşan dmitawdıci u darğo du gumruk dmahıt calu malathe dıkmote l’Amerika.

A egrothani, kmıntır dmişadri yawme d’Tre dothe l’athrawotho frişe xıdu Hınd, Yaban, Huyodo d’Urifi bıthır mıd lo mte l’awyutho acmaye bu zabno da 90 yawmani dmahtiwola Amerika qumaye. Belhude Britania u Vietnam mdelın qyomo cam Amerika. Trump lo mawdacle an ışmone dan athrawothani kulle dkıtne bu ğrob qamoyo dgımotelın a egrotho. Mu yarho d’Ob kmıntır du gumruk dcole l’70 ba mo.