Trump mhadadle u İran cala hjome dkobıc dsoyım cala yuthrone Amerikoye

U rişono d’Amerika Donald Trump b’zuhoro qaşyo mhadadle u İran dgıdmitahwele funoyo qaşyo b’alfo naqlat, ida dımnasyo Tahran dhıjmo cala yuthrone d’Amerika bu madınho mescoyo xıd myodo du hayf du qatlo du rişono d’Faylaq Alquds Qasem Sulaymani.

 Camgabıdathe, u waziro di baroyutho d’Amerika Mayk Pompeo sımle sturyo u athro dı Fransa cal dlımbayanle hul ucdo u gabo d’Hizballa xıd tukoso marıhbono.

 U rişono d’Amerika Trump bi maqırhonutho dıfrısle bi dafayde du Twiter mırle “u İran lfuth taşrore da gelyunore balki kımtayıb dsoyım suikast du qatlo aw hjomo cal Amerika laşan dmoyıd u hayf du qatlo du rişono marıhbono Qasem Sulaymani dıqtılwo cal dkımtayabwo bu dactid hjomo du qatlo d’haylawotho Amerikoye u gıdxolaqwo mahişonutho dgımdawmowa lışne yarixe”.

Bebzabno, Trump mawdacle d’Amerika gıdobo funoyo qşeytır b’alfo naqlat layna hjomo dkibe dsamle u İran cal Amerika. İ sferyawmo Amerikoyto d’Politiko, mawdacwola lfuth taşrore da nistixbarat u İran kdorış dımtayıb tahrazto du suikast du qatlo di rişathızgadto d’Amerika dkıtyo bu athro du Tayımno d’Afriqya Lana Marx dkıtyo qaruto mu rişono Donald Trump.

Camgabıdathe, u waziro di baroyutho d’Amerika Mayk Pompeo bi mimartho dıfırsole bi sferyawmo Franşoyto d’Lofigaro, kımşayıl ida dı Fransa hadırtoyo dkılyo cam Amerika mqabıl du İran, u dımamno u şlomo wi şalyutho qlimoyto.

Pompeo mırle “u İran bıthır mdımdele u qyomo du nukler, snıdle a’Huthiye dkıtne bu Yemen dıhjımlın cal şutose du nafto b’gawıd di Scudiye b’soruhe İranoye. Bebzabno, u İran matharle calu zawco di tagorutho du yamo du Xaliç Caraboyo”.

U waziro di baroyutho d’Amerika bi mimarthayde mamteleste lu bolo dı Fransa heş krıfdo dımbayno agrube d’Hizballa d’Lebnon xıd tukoso marıhbono. U mdarbıd du medano, Fransa kımdawmo dmacişo ruha bi teşcitho dıkfırşo bayn di gefo folitiqoyto d’Hizballa wi gefayde i folhoyto.

U waziro di baroyutho d’Amerika Mayk Pompeo mawdacwole lumıhreno di şultonuthayde kımdawmo dsaymo qroyto lu Huyodo d’Urifi ula nathrawotho hrene Urifoye dımbayni Hizballa d’Lebnon xıd tukoso marıhbono aw dmıncile kulonoyith.