Tuma Çelik huwle maqırhonutho cala yuqdone dıkmdawmi bu athro d’Turkiya

U qoyumo şaryo du cameydan bu parlamento d’Turkiya Tuma Çelik, huwle maqırhonutho cala yuqdone dıkmdawmi bu athro.

Me gabo hreno bu qaytano hawi yuqdone b’athrawotho mşahılfe. B’Amerika kito adyawma jğer mu yuqdono d’Kalifornia hol 97 yuqdone b’dukotho frişe. Ubu Yawnan’ste kımdawmi a fulhone leşan u tetfiyo di nuro hedor i arişkoyto Athena.

Hani kmo yawme, kımdawmi a yuqdone bhol 16 dukotho u cobe frişe d’Turkiya u hın menaye’ste, nafiqi mu kontroll. Bi maqırhonutho dfrısle u qoyumo Tuma Çelik bi dafayde du Twitter cali sbuthathe da yuqdone komır; Bu zabno du tbocofroso dıksonıd u rişqutno kısoyım propoğanda, Erdoğan mhalaqle i mşalutho da dukotho d’yaqidi cala mşale da karxwotho.

Çelik mırle; İnaqla farsufo bu ftoho di şuşaye kobıc dhowele yuthrono; inaqla dkowe hboso acle, kıhozina aydarbo kımnase dmaxlıs ruhe. Furqono layto, u camo gıdbalxun u droşo dıklozım. Ba melani u qoyumo du cameydan kısoyım sturyo qaşyo i şultonutho du athro, dlıkmaydo i mşalutho dıknuflo acla bi sbutho da yuqdonani. İ KCK’ste rfıdla athmıl baroyo a thome dımqadmi, du gerillayda’yo maqıthle i nurathe b’Turkiya.

Bebzabno a yuqdone qaşın hedor i arişkoyto du Yawnan Athena uhol 500 falohe di tıffayo kıfulhi yawmo u lalyo leşan dmatfın i nurathe. I şhantho yaqırto dhawyo adşato bu Yawnan, kmifaşqo i qşitho kulle ban 40 eşne haroyani uban alfayo dıbnaynoşo, jbiri dtorın ma botathe leşan dxulsi ma yuqdonani. B’duktho frişe di arişkoyto, matyo i hırara l’42 darçat.

Camgabe d’Turkiya u Yawnan, bğer athrawotho u mdinotho hrene’ste nafıq ba şabani yuqdone qaşye u hdo ma dukothani’ste, Kalifornia d’Amerika’yo u acmani’ste, kito adyawma 97 yuqdone b’dukotho hrene du athro. A yuqdonani di marcitho dıkmdawmi hani 3 şabe u dıkmibarbızi mi hawa, mahıt ışmaye Dixie uban alfayo dönumat d’arcotho yaqidi ubı dukotho’ste matın la fınyotho da comure. Calathe hol 20 alfo falohe di tıffayo, kobın ağono dmatfın i nuro wa comure kmınqoli lğer fenyotho.