Tuma Çelik mqadamle rmoyto lu rişono du parlamento bi sbutho da qatle du cameydan dhawınwo ba 90’yat

U qoyumo şaryo du cameydan bu parlamento d’Turkiya Tuma Çelik, mqadamle rmoyto lu rişono du parlamento bi sbutho da qatle du cameydan dhawınwo ba 90’yat, dhul adyawma layto noşe dımahışwi aclaye.

 U qoyumo kımşayıl mu rişono du parlamento, mın buhone sim cala qatlani d’mahıt ışmaye qatle dlatne a qotolathe idice.

U qoyumo bi rmoyto dımqadamle lu rişono du parlamento kıtolıb mu waziro di kinutho dobe funoyo cala şuwole dımşayl bi sbutho da qatle dhawın calu cameydan ba 90’yat. U qoyumo bi rmoyto kmahke calu qyomo dımdewola Emwotho Maydotho dkıtyo mqabıl du veyoco da farsufe bi zoriye, elo Turkiya heş lo mdela u qyomano.

Ba 90’yat bu qrobo dbeyn da hayle di PKK udi şultonutho, mahıtwola Turkiya  tedbire şnize dhawın celtho li golutho d’mılyune dıbnaynoşo u mawqıd qıryawotho uğer’ste maxlanwo. Bu zabnano d’qtılwo zıttır me 50 farsufe mu camaydan u şerşoyo. U cameydan mgalwe l’Urifi u rahıqwo mu athreyde uma timoyothayde.

U qoyumo du cameydan Tuma Çelik bıthır mıd kmahke a ışmone dhın ma mşale du cameydan d’qtili ba 90’yat, kroyız a şuwolayde lu waziro di kinutho d’Turkiya Abdulhamit Gul dkobıc funoyo aclaye. Bi qmayto u qoyumo kımşayıl en u waziro sımle fulhono aw buhono mede bhaq da qatlani.

Kimo masıdre da qatole dlatne idice ftih hul adyawma: kimo ma mahkamat diftihi bha da qatlani mawsqi lu bethdino d’Urifi. İ dacwa dftıhto bhaq du qatlo du rişono di karxutho d’Bethzabday Şukru Turtuşli mın hawi mena, u be bzabno a masıdre di mahkeme du qatlo d’Yahkub Mete men hawi menaye. Ubi harayto i sbutho du osyo Edward Tanrıverdi mın hawi mena.