Tuma Çelik sımle mamlo bu parlamento d’Turkiya calu Sayfo

U qoyumo du camaydan bu gabo d’HDP Tuma Çelik bu mamlo dsımle bu parlamento d’Turkiya, mahkele cali dişutho dhawi cala Suryoye mu zabno du Sayfo uhol adyawma.

 Bu mamleyde Çelik mırle; A mdabrone du athrano, qulnaqla kmankıri u dacbar dkıtlın u mawxa lıkowe demoqratoyutho bu athro.

 Bu şuroyo du mamlayde u qoyumo du camaydan b’HDP Tuma Çelik mırle; A mdabrone lo kubci dmamtın lıbolaye yaste, kımankıri u makthabzabno. Bram u tenkiro lıkmşahılıf i şrorutho du maktabzabo, u athrano kıtle nesyuno ğalabe bi sbuthathe. Lo tocina u tenkiro di şrorutho dacbar, kımamte camruhe qtolğense dyoşo u darbat hathe. Ahna cayşina u şwolano, huru mathlo lu medano b’safrayto kmimıd dayroyo dıkhoye b’dayro b’rişe du turo. Wu dayroyano i şıltonutho ema u layko dıkquryole kızze. Bi duktho dıkhoyın a Suryoye qulnaqla kıqaytho nuro wi şultonutho lo kmakiwo rişa u kturyola hol dtufyo qum ruha.

Bu şıkılano u qoyumo Çelik kroyız i dişutho dkowe calu cameydan u komır; U tahdid du tehito di ido cala mulkone du cameydan. Lfuth a qonune d’Lozan dkıtlan zedqe du leşono, da haye udi tawditho elo lıkmitahwe fsoso dhoyina a hayeydan bi hiyoyutheydan. Wi naqla dıknufqina mqabıl du mede dkowe, kmitahıt u tabco di xiyene aclayna. Bıthır u qoyumo kımamte u mamleyde li sbutho du Sayfo u komır; Adyoşani kulle mşarelın mu zabno du qtolğenso dsim calu camo Suryoyo dıkomarle Sayfo. Mu zabnawo uholucdo kımdawmi a dyoşani.

Bi şato dan 1915 u mınyono du camo Suryoyo dkıtwe zıttır me 700 alfo, hol 300 alfo qtiliwo u 200 alfoste jbiri dımgalwın ma dukothathe. Ban 1924, 80 alfo ma Suryoye madınhoye yaste Nasturnoye mawfıqi mu athro. Ban 1928 sxiri a 2 madraşyotho du camo Suryoyo, bıthır bzabno i fatıryarxutho da Suryoye dhawiwola zıttır me 600 eşne mawfıqo mu athro. Bu şıklano u qoyumo mahkele calu dyoşo udu mafqono du camaydan mu athro u mdawamlın xıdi sbutho d’Qufrus hola 80’yat dmahıt majburiye cala nacime da Suryoye dıqorın i tawditho Maşılmonitho ba madraşyotho di şultonutho.

U qoyumo du cameydan Tuma Çelik bıthır komır; Cıl ma sebwothani kulle inaqla di şultonutho huwla fsoso lu cameydan dıdocır lu athrayde mi golutho, elo naqla hreto laqi ba dyoşe uba hbose dhawın acle. Laşan dhoyina haye mamne camıhdode toxu hıkmina u makthabazabno u mawdena bu Sayfo dhawi calu cameydan, leşan dawsat d’haye hathe bu dactith. U buthomo du mamleyda Çelik mırle; Kıkoyafno rişi qum da sohde du Sayfo dan 1915. U mqadamle tawdiyotho la qoyume dkıtwın hadire.