Tunıs kobıc dımcadel an esorayde cam Suriya

TUNIS – U rişqutno d’Tunıs Kais Saied athmıl mawdacle, dkobıc dhoze d’Tunıs u Suriya dımbayni a rişayızgade dlan athrawotho dıhdode, KHıd remzo dmitarkıw esore diplomatikoye hathe camu rejim d’Başar al Asad. Saied mawdacle lu waziro di baroyutho Nabill Cammar, dıklozım cal qariwo dmaydi fusqono bi sbuthathe.  

Tunıs qtıcwola  esore diplomatikoye cam Suriya meqım 10 eşne xıd protesto mqabıl da hçome barbroye du rejim d’al Asad cala mtagliyone mşayne ba 2011, dbıthır qalibi l’qrobo gawoyo dhawi celtho lu qatlo ba mo alfayo dıbnaynoşo uba milyone hrene dımgalwın ma dukothathe. 

Mu zabno du rişqutno athi li rişonutho b’Tunıs ba 2021, mahwele remze dkıtyo ftiho l’esore diplomatikoye cam Suriya u bıthır mu zulzolo dhawi b’Suriya’ste, mşadarla Tunıs mcadronutho noşoyto l’Holob. Elo Amerika dlatla niye dımcadlo a esorayda camu rejim d’Suriya, saqıbloytoyo u lıkımşaçco an athrawotho hrene’ste dımcadli a esorathe cam Darımsuq u ktulbo menaye, dımdawmi dmahti tedbire acla.   

İ wazirutho di baroyutho d’Amerik mırwola; Amerika lıkımcadlo u loste gıdımhathıtho an esorayda a diplomatiqoye camu rejim d’Suriya u camatheste, lo kubcina dğer athrawothoste dımcadli a esorathe acme, mi celtho da hawbe barbroye dsımle u rejim calu camo d’ruhe. Awkith al Asad, latle qonunoyutho bcaynayna u calathe layban dımcadlina a esoraydan cami şultonuthayde.