26/05/2021

Turkiya huwla husrono lı cito dı qritho hreto du camaydan bi hiğmonutho d’Nuhadra

Turkiya huwla husrono lı cito dıqritho hreto du camaydan bi hiğmonutho d’Nuhadra. Dawoud Yuxanna dkıtyo ha ma comure di qritho d’Mıska mırle; A kawe-a şubake di cito twiri uğer bote di qritho hzelın husrono rabo.

Bebzabno mawdıc, mcal fothe da hçomani da hayle kaboşe d’Turkiya cal Nuhadra, yaqıd hol 4 alfo dönume d’arcotho u cobo di hiğmonutho.

Turkiya xlıqla naqla hreto zuctho ba lebawotho da comure da qıryawotho dkıtne b’Nuhadra bu garbyo du Iraq. Athmıl ba şoce du lalyo, sımlın a tayosyotho d’Turkiya cuqobe qariwo lıhdo ma qıryawotho du camaydan b’Nuhadra. Bu hçomano, hiw husrono rabo li cito di qrithathe ula bote da comure.

U tebano dfris bi dafo d’Rudaw, sim maqıblonutho cam ha man abne du camaydan Dawoud Yuxanna dıkcoyış bi qritho d’Mıska, dkıtyo 100 metrowiye mi qritho dsim u hçomo acla. Lfuth Yuxanna, a comure da qıryawotho di hiğmonutho kulle kıcayşi bi zuctho u lıkqudri dımxi b’lalyo inaqla dışumci u qolo da tayosyotho Turkoye.

Yuxanna mawdacle di kawtho di cito di qritho şbobto twiri wa bınyone hrene hzelın husrono. İ qritho d’Mıska, kınuflo 15 kilometre ma qıryawotho hrene du camaydan Kısta u Calke-dmaxlın ba zabne haroyani ma comurathe mcal fothe da hçome d’Turkiya. Li qritho d’Qısta dacırwo 8 yaqrotho i sagiyoyuthathe Kurdoye. Bu hçomano u haroyo’ste, mawdıc dımçarıh 2 farsufe. Mcla fothe da cuqobani dıksaymo Turkiya leşan dmıhyo bu gerilla di PKK, kowın celtho l’yuqdone qaşye.  Lfuth u polis d’Nuhadra, mu şuroyo di şatathe uholucdo yaqıd hol 4 alfo dönume d’arcotho mcal fothe da hçomani d’Turkiya.

An arcothani kmıhşowi dukotho du qrobo u noşo lıkmaçre dızze l’tamo u hatta u polis’ste lıkızze. Calathe inaqla dkowe hawxa yuqdone, noşo laybe dızze ltamo leşan dmatfın i nuro ubu şıkılano, xayifo kmibarbızo cami hawa. Calathe layt duyoqo kamilo cala dukothani, mcal fothe da gzome da hçomani d’Turkiya.