Turkiya kdeyşo uqyomo di şalyuth zeyno b’İdlıb

Bu zabno du gayso du rejim d’Suriya kısoyım şuşote hathe hedor İdlıb, thımla Darımsuq a marhıbone bnayqyomo d’Turkiya bu dyoşo du qyomo di şalyuthzayno bu qlimo.

 U rejim mawdacle da marhıbonani, dışlın 19 naqlat u qyomano di şalyuthzayno b’İdlıb.

Athmıl casriye sımle u gayso du rejim d’Suriya şuşote hathe hedor u qlimo d’İdlıb-dlo hçome u taxtuşe mqabıl da marhıbone dıkmısnodi me Turkiya. Bu zabno du şuşotanoste, thımla i şultonutho d’Darımsuq a ğrobani bu dyoşo di şalyuthzayno 19 naqlat.

Mawdıc du rejim qadır athmıl dmarkıw nuqazto d’Mcarat Mawoz u al Bureij dkıtne qariwe l’Kafar Nubal dlo taxtuşe cama marhıbonani d’Turkiya. Elo a marhıbone mhelınste 25 soruhe b’3 ma qıryawothani du taymno d’İdlıb.

Bu tebo dfrısla SANA mırla; A ğrobe marhıbone dıkmısnodi mu rejim du rişqutno Turkoyo Recep Tayyip Erdoğan, dışlın u qyomo di şalyuthzayno dmıdyo meqım yawmo. Ban 24 şoce haroyani, dişo i şalyuthzaynathe 19 naqlat u mhe ba qıryawotho.

U qentrun du kordinasyon d’Rusyaste m’akadle u dyoşo du qyomo di şalyuthzayno ma ğrobe marhıbone d’Turkiya. U qyomano mdewo meqım kımo yawme beyn du rişono d’Rusya udu rişqutno Turkoyo. Bebzabno mawdıc da ğrobani, mhelın ba nuqazyotho du rejim d’Suriya dkıtne qariwe lu darbo Emwothoyo d’M4 qariwo l’Cayn Cisa.