04/05/2021

Turkiya kmaqwiyo ruha qariwo la turone dkıtne ahaylawotho di PKK bınne

U gayso kaboşo d’Turkiya bu qrobo dıkmaşe mqabıl di PKK, kımdawım bu kboşo d’fenyotho hathe u stratijikoye bu garbiyo du Iraq.

Lfuth mşalo mu qlimo d’Kurdistan du Iraq, u gayso Turkoyo kbışle hlile u nuqazyotho ulsoye da Mharbone di PKK dkıtne ba turone d’Kiste bi hiğmonutho d’Nuhadra.

U mdabrono di qastra d’Kane Mase bu garbiyo du Iraq Sarbast Alcaqrawi, mawdacle da hayle kaboşe d’Turkiya dhani zıd me şabtho ksaymi cuqobe folhoye bu garbiyo du Iraq, mahıtlın meqım 2 yawme ido cal fenyotho dıknufli b’rişe du turo d’Kiste bu zabno dıkmdawmi ucdo a taxtuşe mqabıl da Mharbone du gabo da Falohe d’Kurdistan-PKK.

Alcaqrawi bi maqırhonutho dhule lu ajans da tebe d’Almanya mırle; Bıthır ma taxtuşe dımdawamlın kmo yawme beyn du gayso Turkoyo udi PKK, a hayle Turkoye mahtlın ido cal hlile u nuqazyotho ulsoye di PKK dkıtne ba turone d’Kiste. A hlilani kmitıstacımliwo xıd nuqazyotho lu gerilla di PKK bnişo dmisım u sutorathe ma hçome oyaroye du gayso d’Turkiya. A taxtuşe qaşye b’şıkıl yawmonoyo kımdawmi bu turo d’Kiste, u hedor di qastra d’Kane Mase, bi qritho d’Hıruri uba fenyotho d’Avaşin u Basyat bu garbay madınho di hiğmonutho d’Nuhadra.

Adyawma u mşalo Kurdoyo bi maqırhonutho dhule l’Pukmedia, mawdacle da tayosyotho Turkoye sımlın hçome cala turone d’Bazye bi qastra d’Kane Mase bi hiğmonutho d’Nuhadra, u mırle; A hçome dsimi adyawma ğalabe qaşyewın wa hayle Turkoye şafici 9 kilomıtre lawğıl dan arcotho du Iraq, ubi netiçe da hçomani menyono celoyo ma comure da qıryawotho çbiri dmahzımi ma fenyothaththe dkıtne qariwe la thume d’Turkiya.

A şuşotani dkowın bu garbiyo du Iraq athın lu hwoyo bıthır me yawmo mi maqırhonutho dhuwole u waziro di gawoyutho d’Turkiya dmawdacwole di şultonuthayde kıbco dımşatso nuqazto folhoyto bi Sulemaniye qariwo la nuqazyotho di PKK. Bebzabno a şuşotani hawın bıthır mi socurutho dsımwole u waziro du sutoro d’Turkiya Hulusi Akar lu garbiyo du Iraq udlo fsoso mi şultonutho d’Boğdod.