Turkiya kmaqwiyo u haylayda b’Suriya

Konvoy folhoyo dı Turkiya dkıtyo matcıno buğre u lojistik cabır li fnitho d’İdlıb bu garbay macırbo d’Suriya.

 Camgabıdathe, Turkiya mşadarla tarte tayısyotho dkibın zıd m’350 çatawiye li mditho d’Misrata bu athro d’Libya.

 İ mşatasto d’Suriya da zedqe noşoye bi maqırhonutho dhula lu tboco froso, mawdacla d’konvoy folhoyo hatho da haylawotho Turkoye cabır mi xasra d’Liwa Aliskandaron li fnitho d’İdlıb bu darbo di nuqazto du thumo d’Kafar Lusin.

U konvoyano dıkmişakıl m’40 radoyotho folhoye matcıne buğre u mcadrınwotho lojistik, maftele fothe lafi maşritho d’Almastuma dkıtyo nuqazto la haylawotho Turkoye calu darbo bayn İdlıb u Ariha.

Bu şıkılano umu zabno di şalyuthzayno harayto uhul ucdo, cabır ba olufe d’folhe Turkoye u 4640 radoyotho mşahılfe. Bebzabno, mu yarho d’Şbot dşaficina uhul ucdo zıd m’7975 kamyone u radoyotho folhoye Turkoye cabiri la narcotho d’Suriya, u zıd m’11 alfo folhoye Turkoye frisi b’İdlıb u hedor di mditho d’Hlob bu garbiyo d’Suriya.

Megabo hreno, u froshezwo d’Alcarabiya Alhadath mawdacle dı Turkiya bakmo şocani dşaficina mşadarla tarte tayısyotho lu bethtawso di mditho d’Misrata bu athro d’Libya. Ba tarte tayısyothani kıtwo 356 jatawiye dkıtne m’Suriya, m’Tunıs, mu Mısır umu Sudan. Bıthır mıdnahiti atarte tayısyothani b’zabno karyo nahito tayısto hreto bu bethtawso d’Misrata dkiba 126 jatawiye.

İ dafo d’Arm News, mawdacla dı Turkiya nqila ba yawme dşaficina hedor 1400 jatawiye ma tukose marıhbone dkıtne b’Hlob u b’İdlıb lu athro d’Libya. A’jatawiyani dınqili bu ğenso mu athro dı Tunısne.

Camgabıdathe, u malolo du gayso athronoyo d’Libya Ahmad Almismari mawdacle dı Turkiya nqila hul ucdo 17 alfo jatawiye Suriye lu athro d’Libya cam menyono d’marıhbone, u hani kulle masılmi zayne yaqure.

Almismari mawdacleste du grub da n’Ahunone Maşılmone d’Libya kıkobış ucdo afenyotho rişoye du macırbo d’Libya bi sdirutho dcamu grub da n’Ahunone Maşılmone dı Turkiya bi rişonutho d’Erdoğan.