Turkiya kmarhıqo ruha mu Huyodo d’Urifi

Bu mamlo şatonoyo dsımla i rişonitho du Mawtbo du Huyodo d’Urifi Ursula von der Leyen mzaharla Turkiya calu qedomeyda li sbutho du Yamo Mescoyo u mırla; Turkiya athumeyda xıd jeoğrafya kmotın l’Urifi, elo bu dumyo dıksaymo ucdo, kımarhıqo ruha me Urifi.

 Bebzabno ba droşe dhawın bu parlamento d’Urifi, bu zyudo da mamle dsımlın a qoyume, mqabıl du rmoşo d’Turkiyawın.

Hani zabno kowe maqırhonwotho u droşe ma mşale d’Urifi mqabıl da zawce u da rmoşe dıksaymo Turkiya gawonoyith u bu Yamo Mescoyo dilonoyith.

 Ba droşe dhawın athmıl bu parlamento d’Urifi bi rişonitho du mşalo da esore baroye du Huyodo d’Urifi Josep Borell, bu zyudo a qoyume ba mamle dsımlın mawdaclın ilo thnihuthathe mqabıl d’Turkiya u hın menaye mırlın; Urifi klozım maydo fusqone qaşye mqabıl d’Ankara xıd mathlo dmitaklın amcadronwotho momunoye dıkmitahwela u dmitaklın adroşe du cboro d’Turkiya lu Huyodo d’Urifi bnaqla hıdo, hol d’Turkiya dımşahılfo i hzayteyda.

 Ba mamlathe a qoyume sımlın sturyo qaşyo Turkiya u mahwelın u snodayda la 2 athrawotho hadome d’Urifi u Yawnan u Qufrus, dkito ducdo mwatyutho cam Turkiya dmatyo l’darğo du qrobo. Me gabo hreno bu mamlo dsımla i rişonitho du Mawtbo du Huyodo d’Urifi bi cohnutho dhawila şato dımnaqyo li wolithathe, kalyo calu qedomo d’Turkiya u mawdacla en dımdawmo Turkiya bu dımyano, gıdturyo da esore dmıqtoco acma bnaqla hıdo.

 Ursula Von der Leyyen bu mamlayda mırla; Turkiya athumeyda cam Urifine elo ba zabne haroye urmoşo wa zawce dıksaymo, kmarhıqo ruha ma esore dcam Urifi. Bebzabno klozım dmidıc, ahna gıdsundina anathrawotho hadome du Huyodo, en dhowe qrobo beyn elaye u Turkiya.

 Von der Leyyen mzaharla Turkiya u mırla; Turkiya klozım dturyo ma tahdide dıksaymo lanathrawotho şbobe dkıtla hano latyo mede dıkmitaqbıl. Lfuth a droşe wa maqırhonwotho da mşale d’Urifi, kmahwe Turkiya krıhqo mu Huyodo.