10/06/2021

Turkiya knıqlo marhıbone mu athro d’Libya lu athro du Iraq

U Mawtbo da esore baroye d’Urifi, ba maqıblınwotho dsımle cama came du Huyodo d’Urifi, mahwele di sagiyutho da bnaymothoye kımqadmi l’Turkiya xıd athro bceldbobo.

Mxasra hreto, i mdabronutho di PKK sımla qroyto la hayle ulu camo Kurdoyo dbritho, dsundi u gerilla bu qrobo dkobe mqabıl d’Turkiya.

Bu zabno d’Turkiya mhalqo dawsat laxalf bi sbutho da kayle di demoqratoyutho uda zedqe noşoye, u Mawtbo da esore baroye d’Urifi sımle maqıblınwotho cam bnaymothoye d’athrawotho frişe du Huyodo d’Urifi cali hzaytathe l’Turkiya. Ba maqıblınwotho mahwele d’26% mo ma Urifoye kımqadmi l’Turkiya xıd athro dkıtyo bceldbobo yaste xıd athro dkıtle qale cam Urifi. 25% ma Urifoye kmıtyaqni d’Turkiya şoriko ulsoyoyo l’Urifi u belhude 4% dhulın a hzayothathe d’Turkiya bnayqyomo u kıtle yuthrone mşawtıfe cam Urifi.

Beyn da Urifoye dıkmqadmi l’Turkiya xıd athro bcelıdbobo- athyo Almanya bu darğo qadmoyo da qole 41%. Me gabo hreno, i PKK, frısla buyono cala hçome d’Turkiya calu garbiyo du Iraq, ucali klayto dmahwelın bi sbuthathe. Bu buyonayda i PKK mawdacla di şultonutho du qlimo d’Kurdistan lıkkowe dfayşo şlitho mqabıl da hçomani d’Turkiya, elo klozım dımqadmo li sbuthathe b’reğşo athronoyo Kurdoyo, u dsaymo qroyto la hayle du qlimo kulle dmahwın mrodo mqabıl du kboşo d’Turkiya.

Bu huthomo i PKK mawdacla du gerilla kobe ağuno mqabıl du athro faşist d’Turkiya, bnişo dmıxlıq haye hire d’neshono, u sımle qroyto la hayle ulu camo Kurdoyo dmıştawtıf acmaye bu mrodo, u dsundi a Mmharbone leşan dmitahwe husrono l’Turkiya. Mxasra hreto, u ajans d’Roj News bi mawdconutho dmatile me hın mabuce folitiqoye bu qlimo d’Kurdistan du Iraq, mawdacle d’Turkiya kınuqlo marhıbone me İdlıb d’Suriya ume Azerbaijan u Libya lhın fenyotho bu garbiyo du Iraq, bnişo dmıştawtıfi lu qrobo mqabıl di PKK.

Lfuth a mabucani, a marhıbone d’Turkiya kmınqoli ba tayosyotho l’Coman ubıthır lu bethtawso d’Arbil, ume tamo kmişadri l’Haji Cumran, l’Soran ul’fenyotho hrene d’Bahdinan. Lfuth d’Roj News, u nqolo da marhıbonani kmisım bi mdabronutho du MİT d’Turkiya u mşale du gabo Demoqratoyo d’Kurdistan-KDP. Cama marhıbone, kito’ste Kurdoye dhzelın droşe me Turkiya.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…